FRETILIN-PD Mantein Kompromisu

DILI, (TATOLI) – Partidu Frente Revolusionária Timor-Leste Independente (FRETILIN) no Partidu Demokrátiku (PD) mantein kompromisu anterior katak sei la’o hamutuk fali hafoin rezultadu eleisaun antesipada.

Sekretáriu Jerál partidu FRETILIN, Marí Alkatiri, fó sai deklarasaun ne’e liuhusi konferénsia imprensa ne’ebé organiza hosi estrutura FRETILIN no PD ne’ebé hala’o iha Hotel Ramelau, Aimutin, sábadu ne’e.

Marí esplika FRETILIN ho PD halo koligasaun ho baze Sétimu Governu Konstitusionál.

“Ohin ami mai ho kontente apela ba povu tomak atu túr hakmatek”, líder nasionál ne’e dehan.

Marí mós husu ba lideransa polítika partidária koligasaun sira atu hotu-hotu hamutuk simu rezultadu eleisaun, tanba ne’e povu nia vontade.

“Lalika buka estratéjia oi-oin para kestiona lejitimidade povu nia votu, tanba serbisu ne’ebé maka Instituisaun Administrasaun Eleitorál halo ne’e ho transparénsia no profisionalizmu”, propoin.

Atuál Primeiru Ministru Sétimu Governu Konstitusionál ne’e hateten bainhira dúvida ba rezultadu eleisaun bele ba Tribunál Rekursu atu aprezenta provas hodi hetan lia-loos.

“Agora la’ós tempu kampaña. Agora tempu atu respeita povu nia vontade ka povu nia votu”, akresenta.

Iha fatin hanesan, Prezidente PD, Mariano Assanami Sabino, agradese ba povu tomak ne’ebé ezérse ona direitu ba votu no agradese mós ba padre, madre no bispu sira.

Assanami husu ba povu no lider partidu polítiku sira atu hakmatek no simu rezultadu eleisaun antesipada tanba lakon ka manán ne’e lala’ok demokrasia maka hanesan ne’e.

Jornalista: Xisto Freitas | Editora: Rita Almeida

Imajen: Lider partidu FRETILIN no PD, deklara ba jornalista sira iha Otel Ramelau Ai-mutin, ohin katak mantein kompromisu hodi simu desizaun hosi povu. Foto Tatoli/Xisto Freitas