DILI, (TATOLI) - Orsamentu Jerál Estadu
(OJE) 2018, sei hamenus kapitál infraestrutura (dezenvolvimentu) ne’ebé boot no
sei la aumenta kapitál menór barak-barak.
Tuir Ministru Reforma Lejizlativa
no Asuntu Parlamentares, Fidelis Leite Magalhães, razaun hamenus no la aumenta
kapitál infraestrutura ho kapitál menór, tanba laiha tempu atu ezekuta.
“Preokupasaun mak atu responde ba
nesesidade imediata husi populasaun nian, asegura funsionamentu administrasaun
públika no selu mós ba dívida sira ne’ebé mak iha, atu bainhira to’o tinan ne’e
remata laiha ona dívida no ita bele konsentra de’it ba prioridade
dezenvolvimentu”, Fidelis Magalhães tenik ba jornalista sira iha Palásiu
Governu, ohin.
Tuir governante ne’e, problema
mak bainhira tau osan, maibé prosesu administrativu hanesan kontratu seidauk
loos, fim do ano osan alokadu maibé labele halo pagamentu.
“Primeiru-Ministru nia
orientasaun klaru, katak membru governu sira tenke hare ba dívidas, atu rezolve
lai, mas para ida ne’e membru governu sira tenke asegura kontratu sira tuir
dalan loloos, prosesu administrativu sira tenke la’o tuir dalan para bele
efetua pagamentu. Selae ita aloka orsamentu tinan 2018, maibé la konsege halo
pagamentu tanba prosesu seidauk finaliza”, nia haktuir lia menon Primeiru
Ministru nian.
Hatán ba tempu aprezentasaun proposta
OJE tinan 2018 ba Parlamentu Nasionál (PN), eis deputadu ne’e informa, sei halo
prosesu hotu para bele la’o lalais tanba tinan ida ne’e governu tenke finaliza
OJE 2018 iha tempu badak, no prepara OJE ba tinan 2019, ne’ebé tuir lei tenke
tama tarde liu loron 15 Outubru 2018.
“Tetu orsamentál US$ 1.218
millions ba OJE 2018 nian, nia detalla bainhira to’o Parlamentu mak ita hare
tanba iha ne’ebá sei iha jeneralidade no espesialidade, ne’ebé sei iha
diskusaun naruk,” Fidelis argumenta, no promete “Governu sei kumpre rekizitu
legais ne’ebé sei tama ho tempu atu responde ba nesesidade sira.”
Entretantu Preparasaun governu
atu hakotu rejime duodecimal husi fulan Janeiru to’o Jullu no fulan Agostu atu
funsiona ho Orsamentu Jerál Estadu (OJE) 2018, halo ministériu sira tenke
esforsa-an hodi fahe orsamentu tuir tetu orsamentál tinan 2018 (limite másimu
orsamentu), ne’ebé Konsellu Ministru aprova ona ho montante US$ 1.218 millions.
“Prosesu ne’e hanesan prosesu
todan iha Ministériu Finansas nia kabas tinan ida ne’e, tanba sira tenke hare
ba buat rua ne’ebé mak importante tebes, alende ne’e ezije serbisu makas atu
bele finaliza iha tempu badak, OJE tinan 2018 no 2019”, nia informa tan.
Jornalista: Julia Chatarina | Editór:
Manuel Pinto
Imajen: Ministru Reforma
Lejislativa no Asuntus Parlamentares, Fidelis Leite Magalhãeas. Imajen
TATOLI/António Gonçalves
Sem comentários:
Enviar um comentário