DILI, (TATOLI) - Ró Pacific Aria ho
pasajeiru pur volta 2000 resin vizita Timor-Leste no entre vizitante sira
ne’e iha 1.290 mak sei tun hodi paseiu iha sidade Dili no balun bá Ermera no
Likisá.
Diretór Jerál Turizmu Ministériu
Turizmu, Komérsiu no Indústria (MTKI), José Filipe Dias Quintas, informa iha
300 resin mak hola pakote halo viajen bá Ermera hodi vizita empreza Timor
Global kona-ba Kafé nian no Likisá liuliu Maubara hodi haree artezanatu
no paizajen iha área refere.
“Restu sira ne’e pasiar iha Dili
laran, balun bá Kristu Rei, Muzeu Rezisténsia, Palásiu Governu, merkadu Tais nó
mós fatin turístiku sira ne’ebé besik iha sidade Dili”, Quitas hatete ohin, iha
Portu Dili.
Nia afirma turista sira ne’e iha
Timor-Leste durante oras ualu no sei kontinua sira-nia viajen iha tuku neen
loraik.
Diretór Jerál hatutan maski
situasaun polítika ne’ebé nasaun ne’e hasoru, maibé MTKI kontinua fasilita
kruzeiru ne’e, haka’as-an nafatin, serbisu hamutuk ho ministériu relevante sira
para dezenvolve tuir kbiit ne’ebé iha mezmu problema uitoan iha
orsamentu, maibé ministériu sempre responde nafatin ró ne’ebé mai.
“Ami serbisu hamutuk ho
autoridade portu Dili, PNTL sira, kuarentena, imigrasaun, no parte hotu sira fó
apoia másima vizita ró iha ne’e. Ekipa kuandu forsa ita-nia serbisu mós kmaan.
Ne’ebé ró ida mai ne’e hotu-hotu kontribui, ita-nia setór privadu mós serbisu
hamutuk ho ita para oinsá dezenvolve nafatin setór turizmu krizeiru ne’e ho
di’ak”.
Antes ne’e mós ró P & O
Carnival halo vizita mai Dili
ho total pasajeiru hamutuk 2000. Tuir informasaun husi autoridade ró refere
ne’ebé Ministériu Turizmu, Artes no Kultura (MTAK) hetan katak total 1,700 maka
tuun husi ró hodi halo atividade tour iha sidade Dili no kuaze 200 turista mak
halo vizita ba Dare no Maubara.
Diretór Nasionál Marketing
Turizmu no Relasaun Internasionál, MTAK, José Quintas relata katak ró kruzeiru
P & O Carnival hanesan ró kruzeiru ne’ebé ho kapasidade boot iha Mundu. Ró
ne’e mai husi Australia ho nia route Timor-Leste, Illa Komodo (Indonesia),
Bali, Singapore no sei fila hikas fali ba Australia.
Jornalista: Maria Auxiliadora | Editór:
Manuel Pinto
Imajen: MTAK
Sem comentários:
Enviar um comentário