PR sei promulga kandidatu Vise Xefe Estadu Maior F-FDTL

Ministru Defeza, Filomeno Paixão, informa, proposta brigadeiru nain haat ne´ebé antes ne’e Xefe Estadu Maior F-FDTL Major Jeneral Lere Anan  Timur hato’o ona ba Governu, hein Prezidente Repúblika (PR), Francisco Guterres ‘Lu Olo’ promulga.

“Tuir lei  ne´e ami rona no konsulta no señor Jeneral haruka  proposta sira nain rua ona hasa’e ba Konsellu Ministru mós hatan hotu ona,  agora Konsellu Ministru hasa’e ona ba señor Prezidente Repúblika hein Prezidente Repúblika atu promulga de´it”,esplika Ministru Ministru Defeza no  Interior Interino Filomeno Paixão, ba GMN Segunda kalan (13/08/18), iha studio GMN 2 Bebora Díli.

Governu rekomenda ona ba Prezidente Repúblika Francisco Guterres ‘Lú Olo’  atu  promulga, hodi sai hanesan Vise Xefe Estadu Maior F-FDTL hodi troka eis Xefe Estadu Maior Filomeno Paixão, ne’ebé asume ona kargu nu’udar Ministru Defeza no  Ministru Interior Interinu iha  VIII Governu Konstituisional.

Husi kandidatu nain haat ne’e, Filomeno Paixão, la esplika  ba públiku, tanba kompetensia iha Prezidente Konsellu Ministru.

Antes ne´e Xefe Estadu Maior F-FDTL Major Jeneral, Lere Anan Timur, hato´o proposta ona ba governu mak kandidatu nain hat hanesan Brigadeiru Jeneral  João Miranda ‘Aluk’, Brigadeiru Americo Ximenes ‘Sabika’, Brigadeiru Cornélio Ximenes ‘Maunana’  no  Brigadeiru  Domingos Raul ‘Falur Rate Laek atu nune´e Governu bele rekomenda  brigadeiru nain rua  ka ida hodi Prezidente aprova sai hanesan Vise Xefe Estadu maior F-FDTL. avi

GMN TV | Grupo Média Nacional