Deskonfia Pesoal Polisia Baku no Tiru Joven Rua

DILI: Asaun husi pesoal Polisia Nasionál Timor Leste (PNTL) rezulta tan vitima. Mane na’in rua deklara aan sai vitima asaun baku no tiru husi pesoal polisia ida durante feira ne’ebé hala’o iha Bairropite.

Vitima na’in rua ne’ebé nu’udar bin-alin, Julia Chatulessy no Wilson Valdo Correia Rosa, hakat ba Asosiasaun HAK hodi husu asistensia ba kazu ne’ebé sira hasoru.

Tuir kronolojia ne’ebé fó sai husi parte vitima sira katak, iha Kuarta (29/08/2018) maizumenus tuku 12:30 OTL, pesoal polisia ho inisial DB ba taka bola duir (bola guling) iha feira ba komemorasaun 30 Agostu ne’ebé realiza iha Aldeia Laloran, Suku Bairu-Pite, Postu Dom Aleixo, Dili.

Pesoal polisia ne’ebé ho kondisaun lanu ne’e lakon no hahú haksesuk-malu ho joven sira, nune’e hanesan membru komisaun organizadora, Julia koko atu intervene hodi husu ba parte rua atu rezolve ho ulun malirin, maibé pesoal ne’e hahú hasai liatolok.

Haree ba situasaun ne’ebé hahú manas, pesoal polisia na’in tolu seluk ho inisial A, BM no AC hakbesik aan. Haree prezensa husi nia maluk na’in tolu ne’e, DB kaer la metin no hahú halo agresaun fiziku hasoru Julia.

“DB baku Julia nia kanuruk dala ida no tuku nia matan dala ida. vitima sente oin nakukun,” informa reprezentante Asosiasaun HAK, Evangelino Gusmão, liu husi konferensia imprensa iha Asosiasaun HAK, Farol, Kuarta (05/09/2018).

Haree nia bin ema baku, Wilson hakat mai ho intensaun atu sori maibé pesoal polisia na’in haat hahú halo agresaun fiziku no DB losu nia pistola ne’ebé nia sikat iha kanotak. Haree ba ida ne’e, Wilson halai no DB tiru vitima nia kelen parte loos.

La to’o ne’e de’it, DB kontinua hakat ba hodi see pistola ba Wilson maibé la konsege tiru tanba ema taka netik. DB ne’ebé haree Julia koko defende nia alin hasai lia-tolok ba feto ne’e.

“Sorte o feto, lae in* h*** k*** ha’u tiru mate tiha kedas o,” dehan Evangelino hodi hasaran lia-fuan husi DB.

Hafoin asaun tiru ne’e, atividade feira labele kontinua no komunidade sira ne’ebé partisipa halai namkari. Haree ba ida ne’e pesoal polisia na’in haat ne’e estraga sasan iha feira.

Tuir vitima sira aleinde sasan ne’ebé hetan estragus, sira-nia osan ho valor $200 mós lakon.

Ho hahalok ne’e, vitima sira ezije atu loke prosesu investigasaun ne’ebé seriu no lalais nune’e bele fó sansaun ba pesoal sira ne’ebé komete iha kazu ne’e.

“Ami ezije ba Komandu PNTL atu loke investigasaun seriu no aseleradu ba kazu ne’e hodi aplika sansaun disiplinar forte ba autor sira,” deklara Evengelino.

HAK ezije mós ba Ministériu Defeza no Seguransa atu halo revizaun ba lei organika no lei disiplinar PNTL nian hodi kontrolla di’ak liu tan utilizasaun arma.

Aleinde ne’e, HAK mós husu ba Ministériu Públiku atu loke investigasaun ba pesoal polisia tanba sira deskonfia bainhira PNTL mak halo investigasaun rasik bele iha tendensia halakon provas balun.

“Ba Provedória Direitus Humanus no Justiza (PDHJ) atu halo mós investigasaun ba kazu ne’e tanba iha indikasaun forte ba violasaun direitus umanus,” deklara Asosiasaun HAK.

Kazu pesoal polisia baku ema sivil la’os foin mak akontese. Foun liu iha Sabadu (01/09/2018), deskonfia pesoal polisia ida baku mate-restu ida ho naran Andre Rangel Gomes iha Delta Nova.

Cristina Ximenes | Independente