Governu Suspende Pensaun Vitalisia ba Emilia Pires

DILI, (TATOLI) - Ministra Finansas Interina, Sarah Lobo Brites, informa, eis-Ministra Finansa, Emilia Pires durante ne’e la simu osan pensaun vitalisia.

“Kuandu nia kazu ne’e mosu no rejista iha tribunál entaun ita suspende nia hodi la simu osan pensaun vitalisia hanesan eis-titular ida,” Sarah Lobo Brites informa ba Ajénsia Tatoli, ohin.

Sarah Lobo Brites, kontinua dehan pensaun vitalisia ba eis-titular sira no eis-governante sira diferente, tanba alterasaun lei pensaun vitalisia foin mak aplika iha lejizlatura da-lima.

“Alterasaun lei pensaun vitalisia halo ona iha 2017 ho intensaun atu redús osan ba eis-titular no eis governante sira, maibé lei ne’e aplika de’it ba lejizlatura da-lima, enkuantu lejizlatura anteriór sira mantein nafatin ho pensaun ne’ebé mak lei permite molok halo alterasaun,” ministra Sarah reforsa.

Hodi dehan tan, lei permite nafatin ba servidór Estadu, Órgaun Soberania sira hodi hetan nafatin sira nia direitu pensaun vitalisia, tanba ne’e, tinan-tinan sempre aloka nafatin osan atu sira bele hetan direitu tan aseguradu ho lei.

“Ha’u la lori dadus maibé tuir númeru eis-titular sira nian, hahú hosi lejizlatura dahuluk to’o kuarta lejizlatura no kinta lejizlatura simu nafatin, maibé persentajen tun ona tanba ho alterasaun lei,” nia realsa.

Entretantu, iha Orsamentu Jerál Estadu 2018, governu aloka osan ho valór millaun U$ 5.425 ba pensaun vitalisia ne’ebé hetan ona aprovasaun hosi parlamentu.

Jornalista: Zezito Silva | Editór: Manuel Pinto

Imajen: Ministra Finansas en ezersisiu, Sarah Lobo Brites. Foto António Goncalves