DÍLI, (TATOLI) - Primeiru-Ministru
(PM), Taur Matan Ruak, apela ba joven sira, iha Kampus Sentrál, Universidade
Nasionál Timor Lorosa’e (UNTL), ohin katak estuda basá progresu ema ida nian la
depende ba grau akadémiku maibé depende ba kapasidade estuda.
“Ha’u apela ba estudante sira
katak progresu ne’e la’ós konta iha grau akadémiku maibé depende ba kapasidade
estuda; estuda sempre! Normalmente bainhira sei prezidente, ha’u ba iha suku
sira, enkoraja estudante sira hodi estuda no palavra ordem maka; estuda! estuda!
no estuda!, dukur no mate iha livru leten,” apela PM Taur perante universitáriu
sira.
“Entaun, ha’u enkoraja estudante
sira atu estuda barak,” reforsa xefe governu ne’e bainhira sai oradór ba
palestra ho tema: reafirmação valores da resistência da libertação no
processo de desenvolvimento nacional, iha universidade públika Timor-Leste.
PM Taur Matan Ruak akresenta
katak nia prezensa iha UNTL foin dala rua, maske nune’e iha tempu portugés mai
tiha ona iha fatin ne’e; fatin ne’e kondisaun nafatin hanesan uluk maibé ema
mak foun.
“Infrastrutura importante, maibé
importante liu mak rekursu umanu. Ita-boot bele estuda no tuur iha rai maibé
importante mak iha vontade atu hakarak aprende. La iha vontade aprende
imposível atu la’o ba oin,” dehan xefe governu ne’e.
Kona-ba valór rezisténsia,
eis-prezidente Taur Matan Ruak hateten, buat ne’ebé presiza konserva no
kontinua iha prosesu dezenvolvimentu mak jenerosidade. “Fó buat di’ak hotu
ne’ebé mak iha ba bem comum, servi ho domin no paisaun” subliña Taur.
Maske nune’e, atu hala’o hirak
ne’e, tuir PM Taur katak tenke iha objetivu ne’ebé klaru; hatene saida mak ita
hakarak no halo oinsa hodi bele to’o objetivu ne’e. Objetivu luta uluk nian mak
indepedénsia no ohin loron nian mak moris di’ak povu no prosperiedade nasaun
nian.
“Maibé, kontinua nu’udar projetu
koletivu ida husi timoroan sira hotu. Ita la iha opsaun barak, opsaun rua
de’it; ita konstrui nasaun ka destroi nasaun? Atu konstrui, saida mak ita tenke
halo? Realmente luta no serbisu hodi hatudu katak ita la’ós di’ak liu hotu
maibé ita diferente,” akresenta xefe governu governu konstitusionál da-walu
ne’e.
Entretantu, iha palestra ne’e,
Primeiru-ministru, Taur Matan Ruak kompromete katak sei estabelese tan
universidade públika ida iha Munisípiu Aileu, atu prepara estudante sira ba
futuru nasaun nian.
“Ami hakarak imi (estudante sira)
di’ak liu duke ami. La’ós fásil maibé halo. Atu konsege ida ne’e, ha’u iha
rekomendasaun ida, primeiru foku iha objetivu, hatene saida mak hakarak iha,
segundu mak hetan forsa hodi luta no luta la para. Terseiru, iha fé hodi manan,
se la manan ha’u la fiar. Imi bele manan,” enkoraja Taur.
Jornalista: Rafy Belo | Editór:
Manuel Pinto
Imajen: Primeiru Ministru, Taur
Matan Ruak halo Palestra iha UNTL
Sem comentários:
Enviar um comentário