Projetu Relokasaun Terminal Ró Atinje Ona Porsentu 50,7

DILI, (TATOLI) - Ministru Transporte No Komunikasaun, José Agostinho da Silva relata ba Primeiru-Ministru, Taur Matan Ruak, kona progresu projetu relokasaun terminal ró iha portu Dili, inklui servisu ministériu.

Agostinho dehan, progresu konstrusaun portu ferry Dili ho naruk metru 100 ho luan metru 20 atinje ona porsentu 50,7, terminal ne’e sei akomoda ró rua durante oras 24 nia laran, ho andár ida no bele akomoda ema na’in 300.

Aleinde ida ne’e, kompleta mós ho klase ekonomia, VIP (Very Important Person), fatin ba defisiente no labarik sira, nune’e mós prepara ba fatin estasiomentu ba karreta sira ne’ebé tula pasajeiru.

“Ha’u mai hato’o servisu ministériu nian, inklui progresu konstrusaun portu ferry Dili, ne’ebé mak orsamentu ne’e apoiu husi povu no governu Japaun. Progresu konstrusaun ne’e rasik, oras ne’e daudaun atinje ona porsentu 50,7”, tenik ba jornalista sira foin lais ne’e iha Palásiu Governu.

Projetu ne’e tau fatuk dahuluk iha loron 8 Outubru 2017 husi governu Timor-Leste no reprezentante governu Japaun, hetan tulun fundu hosi governu Japaun ho montante ¥2.197 (millaun $20) no husi Governu Timor-Leste rasik millaun $1.

Kompañia Tobishima Corporation mak ezekuta obra ho supervizaun hosi Ides Inc ho Japan Port Consultants Ltd, ne’ebé tuir planu projetu ne’e sei kompleta iha Marsu 2019.

Jornalista: Julia Chatarina | Editór: Manuel Pinto