Timor-Leste Presiza Hametin Soberania Ai-han

DILI, (TATOLI) – Prezidente steering committee organizasaun Hadomi Agrikultura Sustantavel Timor-Lorosa’e (HASATIL), Ego Lemos, hatete polítika husi rede HASATIL maka defende soberania ai-han, katak antes atu ko’alia kona-ba seguransa ai-han Timor-Leste presiza hametin soberania ai-han.

“Soberania ai-han katak hahán ne’ebé maka ita kuda, prodús rasik iha rai-laran, ita presiza halo diversifikasaun nomós ita tenke eduka filafali ita-nia povu atu labele depende de’it ba ai-han ida de’it no ida ne’e maka polítika ne’ebé HASATIL kontinua halo advokasia to’o ohin loron”, Ego afirma iha ámbitu selebrasaun loron mundiál ai-han (ne’ebé monu iha 16/10) ho tema promove ai-han lokál nutritivu hodi hakotu hamlaha no má nutrisaun iha tinan 2030 iha Faról, ohin.

Hatutan Timor-Leste ukun-an tinan 16 ona no hetan influénsia maka’as, maibé Governu foti asaun ho adota polítika oioin no ida maka Objetivu Dezenvolvimentu Sustentavel (ODS) ne’ebé sai hanesan pasu ida importante tebes.

“Ita-nia ajénsia sira komesa implementa programa agrikultura konservasaun, depois ita-nia organizasaun oioin komesa toka ona oinsá maka halo serbisu hanesan konservasaun bee-matan, fini lokál nomós barak komesa dezenvolve to’os eskolár ne’ebé tama iha kurríkulu nasionál no ne’e sinál di’ak ba Timór maski foin ukun-an tinan 16, maibé progresu la’o maka’as”, katak.

Tanba ne’e, buat ida ne’ebé maka movimentu presiza halo maka reforsa de’it saida maka eziste iha país ne’e no labele para no kontinua fó hanoin ba Governu, ajénsia sira ne’ebé  mai serbisu iha Timór atu kontinua respeita matenek lokál no labele estraga rekursu naturál iha rai-laran.

“Tanba ne’e maka ita selebra loron ai-han mundiál, ita labele ko’alia kona-ba ai-han ne’ebé mai de’it husi rai-li’ur, maibé tenke hanoin oinsá maka dezenvolve ai-han ne’ebé maka ita iha rasik”.

Hatutan dalabarak ko’alia kona-ba seguransa ai-han ema hanoin foos mak úniku ai-han ne’ebé asegura seguransa ai-han nia.

“Mas ida ne’e laloos, se estratéjia ida ne’e maka uza, atu tinan atus-ida mós Timór sei la ultrapasa problema seguransa ai-han iha rai-laran. Atu ultrapasa ida ne’e maka ita hotu tenke hamutuk diversifika ita-nia ai-han, ita tenke hahú eduka ita-nia povu, jerasaun foun oinsá maka bele han kahur, atu nune’e labele depende de’it ba foos, tenke aprende han batar, ai-farina, talas, hudi no han tuir tempu kolleta”.

“Se tempu kolleta hare ita han hare, batar ita han batar, ita tuir ida ne’e, se ita han tuir demanda maka produsaun rai-laran sei lato’o”.

Timor-Leste rai ki’ik, foho maka barak, populasaun kada tinan aumenta ba beibeik no rai ne’e la’ós borraxa atu dada luan, tanba ne’e hakarak ka lakohi buka estratéjia foun atubele rezolve kestaun seguransa ai-han iha rai-laran.

“HASATIL nia polítika, ita defende soberania ai-han, asegura fini lokál, bee no rai atu komponente ne’e labele privatiza, povu maka tenke sai na’in duni”.

Prezidente Sentru Lojístika Nasionál (CLN-sigla iha portugés) Ministériu Turizmu, Komérsiu no Indústria (MTKI), Agusto Junior, hatete kona-ba ai-han rai-laran ne’e importante tebes no polítika ne’ebé CLN halo maka koko atu deteta ho di’ak konsome prinsipál iha país ida ne’e.

“Mak foos ne’e ka, batar, kumbili ka saida tan? Ita-nia dadus estatístika lahatudu klaru mai ita konsome nasionál ne’e saida loos, iha rai seluk iha, ne’ebé bele hatene tinan ida bele konsome batar, foos no hahán sira seluk hira? Maibé iha Timór ita seidauk iha”.

Nia afirma tuir kálkulu tinan ida ba foos nian, tinan ida konsome pur vlota tonelada 146.000, maibé realidade produsaun rai-laran ba hare kada tinan iha de’it tonelada 30.800 tuir dadus Ministériu Agrikultura no Peska nian iha 2018 ne’e no bainhira dulas tiha hetan de’it tonelada 18.617.

“Signifika kosumu nasionál ho produsaun rai-laran labele kona malu tanba produsaun rai-laran bele atinje de’it fulan ida ho balun ba konsumu nansionál, entaun dalan ida ne’ebé Governu liuhusi Sentru Lojístika Nasionál tenke halo lalais para prevee buat sira ne’e mak tenke hatama foos husi rai-li’ur”.

Jornalista: Maria Auxiliadora | Editora: Rita Almeida

Imajen: Diretór Ezekutivu Permatil, Ego Lemos, hafoin sorumutu ho Sekretáriu Estadu Komunikasaun Sosiál iha Palásiu Governu, ohin. Foto Antonio Goncalves