Deputadu PLP Konsidera Ângela Freitas ‘Bandida’

Tempotimor (Dili) -- Deputadu Bankada PLP, Francisco Vasconcelos, konsidera deklarasaun portavós grupu Rezisténsia Nasionál Defende Justisa no Konstituisaun (RNDJK), Ângela Freitas, hanesan ema bandidu.

Tuir nia, planu grupu Ângela Cs fofoun dehan atu defende justisa no buka buat ne'ebé loos ba povu, maibé realidade atu soran fali Estadu ida ne'e.

Nia hatutan, iha deklarasaun Ângela hatete sei mobiliza forsa no seguransa atu kontra Xefe Estadu rezigna-aan, ida ne'e de'it kontra ona konstituisaun.

"Deklarasaun Ângela Freitas ne'e hanesan ema bandidu ka ema vandalizmu sira, Ko’alia dehan defende justisa no konstituisaun mas afinál sira maka kontra fali konstituisaun," dehan Deputadu Francisco, iha Parlamentu Nasionál, Tersa (1/9).

Nia afirma, karik tuir planu loron 4 Setembru, Ângela Freitas ho António Ai-tahan Matak sei mobiliza massa hodi manifesta hasoru Prezidente Repúblika, Francisco Guterres Lu-olo, lei fó dalan maibé la’ós uza fali kilat ka sasán kro'at hanesan temi iha deklarasaun Ângela nian. 

Iha fatin hanesan, Deputada KHUNTO, Olinda Guterres hatete, atitude ne'ebé Ângela Freitas halo ne'e nu’udar asaun ne'ebé atu sobu nasaun no la’ós atu defende justisa ka konstituisaun.

Maski nune’e, deputada ne’e la fiar saida maka Ângela ko’alia tanba sira laiha massa atu hatún hodi halo manifestasaun.

"Ângela ninia massa mak ida sé loos. Nia dehan atu mobiliza organizasaun arte marsiál, nia membru organizasaun maka sé loos, ha'u hakarak hatene. Nia partidu de'it ema la hili, agora nia kontinua uza nia partidu ne'ebé kontra tiha ona lei," dehan nia. (*)