SIVIL LABEL DUDU MILITAR BA VIDA POLITIKA

DILI - Eis Sekretáriu Estadu Defesa (SED), Júlio Tomas Pinto husu ba públiku (ema sivil) sira atu labele dudu no influensia militar sira hodi involve iha vida polítika.

Eis Sekretáriu Estadu fó sai opiniaun ne’e hodi responde ba deklarasaun polítika hosi deputadu balun iha Parlamentu Nasionál (PN) ne’ebé hatete, oras ne’e dadauk Xefi Estadu Maior FALINTIL-Forsa Defesa Timor-Leste, Maijór Jeneral Lere Anan Timur harii ona partidu, tanba ne’e husu atu rejigna-án.

Júlio Tomas Pinto ne’ebé mak hanesan mós dosente iha Departamentu Siensia Polítika, Universidade Nasionál Timor-Leste ne’e dehan, tuir Konstituisaun Repúblika Demokrátika Timor-Leste (RDTL) hatete katak, forsa armada la-mete vida polítika prátika.

Normalmente iha instituisaun F-FDTL, Júlio dehan, tuir esperensia ne’ebé iha, bainhira sei sai hanesan SE, militar sira sempre hatete, F-DTL nu’udar militar, hatene polítika, maibé la-halo polítika prátika.

Júlio dehan, militar hatene polítik ne’e atu dehan katak sira tenki hatene prosesu foti desizaun estadu nian, tanba instituisaun FDTL ne’e só defende de’it interese nasionál, defende de’it soberania estadu nian, portantu sira labele mete iha polítika prátika, satanharii partidu polítiku.

Nune’e, regulamentu hot-hotu ne’ebé vigora iha Timor-Leste la fó dalan atu militar ativu ida harii partidu. Júlio dehan tan, nia koñese Jeneral Lere, no Lere ema ida ne’ebé konsentra loloos ba iha militar ne’e para atu dezenvolve militar ne’e, halo tranzisaun ida para jerasaun foun sira mai bele lidera militar ne’e ho di’ak.

“Jeneral Lere nia deklarasaun iha mídia katak nia neutru, ne’e refleta duni ba iha nia hahalok, atetude, komportamentu no professionalismu em termus de militar. Jeneral Lere mós sempre ko’alia bebeik katak jerasaun foun sira presiza prepara ninia-án para lidera forsa ne’e ba oin. Sira katuas ona, sira iha ne’eba (militar) tanba ihapanggilanba sira nia servisu, katak sira atu oinsá lori instituisaun ida naran F-FDTL ne’e, ne’ebé mak sira rasik harii, oinsá lori para depois iha tranzisaun ida entre jerasaun tuan no jerasaun foun sira”, Júlio Tomas Pinto iha Hotel Timor-Dili, Sesta, (13/11).

Júlio esklarese, em termus regulamentu, fó vantazen ba militar para defende de’it interese nasionál, la-haree ba partidu, la-haree ba relijiaun no la-haree ba etníku.

“Ne’ebé deklarasaun Jeneral Lere nian ne’ebé dehan neutru, la-harii partidu, laiha polítika prátika ne’e justifika regulamentu sira hot-hotu ne’ebé vigora, justifika F-FDTL nia papel ne’ebé mak konstituisaun RDTL fó ba sira”, katak tan.

Eis SE ne’e realsa, iha mundu ne’e, ema militar tama polítika, bainhira ema sivil sira laiha kapasidade atu jere estadu, no militar haree katak kompetisaun la-justu ne’ebé mak sivil sira halo.

“Iha ita nia rai ha’u haree katak proseu la’o normal hela. Entaun, polítiku sira labele dudu-dudu militar para atu tama fali ba iha vida polítik. Polítiku sira sem halo investigasaun didiak, du’un matak militar sira tama polítika, ne’e labele”, Júlio afirma.

Nia hatete, kuandu iha atetude ida ne’e bebeik (sivil dudu militar ba vida polítika prátika), ne’e mak iha tempu ida obriga militar tama polítika prátika.

“Sé mak la-investiga, nia laiha direitu atu ko’alia. Ne’ebé kuandu ema polítiku ida temi Jeneral ida nia naran hodi da’et ho partidu polítiku balun, ne’e kuidadu, labele lori no dudu militar sira para tama polítika”, Júlio husu.

Tanba ne’e, Dosente UNTL ne’e husu ba públiku tomak atu hatete militar ida involve iha vida polítika prátika tenke investiga didiak uluk.

“No ha’u apoiu porsentu 100 ba Jeneral Lere nia deklarasaun katak nia neutru, no neutru nafatin to’o ninia mandatu hotu. No Jeneral Lere ne’ebé ha’u koñese no ha’u fiar katak situasaun defisil ruma entre partidu sira han malu, lider sira han malu, Lere foti desizaun neutru defende interese estadu nian”, tenik tan.

Ho ida ne’e, Júlio Tomas Pinto kontinua apela ba públiku tomak atu labele dudu no deskonfia militar iha vida polítika prátika. Hili komandante (Jeneral) ida atu lidera institusaun defeza tanba konfia, se polítiku la-konfia no komesa du’un matak Jeneral sira ne’e signifika katak polítiku sira komesa dudu militar ba polítika prátika.(tay)

Timor Post