Jullu – Dezembru, atualizasaun dadus eleitoral ba timoroan iha rai liur

DILI - Lei eleitorál ne’ebé maka Prezidente Repúblika (PR), Taur Matan Ruak, promulga ona foin dadauk, fó dalan ba timoroan iha estranjéiru hodi tuir eleisaun, tanba ne’e orgaun eleitorál hahú hosi fulan Jullu to’o Dezembru tinan ida ne’e sei halo resensiamentu eleitorál no halo aktualizasaun de dadus ba timoroan sira iha rai liur.

“Hahú hosi fulan Jullu ba to’o Dezembru tinan ida ne’e, konsentrasaun tomak sei haree ba iha resensiamentu no aktualizasaun de dadus timoroan sira ne’ebé maka iha liur,”Vise Ministru Negosiu Estranjéiru no Kooperasaun (MNEK), Roberto Saores, informa ba jornalista sira iha nia servisu fatin, MNEK Praia dos Coqueirus, Dili, Sesta, (24/6), hafoin hala’o enkontru ho Primeira Dama, Isabel Ferreira.

Resensiamentu no halo aktualizasaun de dadus ba timoroan inklui estudante sira iha liur hodi nune’e bele haree kondisaun no senáriu sira ne’ebé maka bele fasilita partisipasaun timoroan sira iha rai liur ba iha eleisaun jerál 2017 nian.

Vise xefe diplomata ne’e hatete, aliende estudante no trabaladór timoroan iha rai liur bele mós timoroan sira ne’ebé maka hala’o vizita badak hanesan troka esperénsia kulturas no sosiál nian karik sei iha baze resensiamentu ka aktualizasaun de dadus ne’e maka sei identifika loloos, oinsá timoroan hotu bele partisipa iha eleisaun jerál 2017.

“Timoroan sira ne’ebé maka iha liur, estudantes hotu tama, servisu ka ou sira balun ne’ebé maka hala’o missaun sira seluk,”Vise MNEK dehan.

Eleisaun jerál 2017 hanesan eleisaun Prezidensiál no eleisaun lezislativu nian, timoroan iha rai liur hanesan iha Indonézia, iha Portuguál inklui iha pais seluk liu-liu timoroan rihun ba rihun ne’ebé dadauk ne’e iha ona Inglatera hodi buka servisu.

Nia dehan, Timoroan sira ne’e sei la lakon oportunidade hodi partisipa iha prosesu demokrásia ba eleisaun nian iha tinan 2017.(dgx)

Timor Post