Governu no rebelde komunista filipina hahú sesárfogu hodi retoma negosiasaun ba pás

Governu Filipina no  rebelde komunista nasaun nian deklara iha sábadu sesárfogu provizóriu ida, pasu préviu ida hodi  hahú fila fali, segunda-feira ne’e, iha Oslo, negosiasaun ba pás. 

"Sesárfogu ne’e sei kontinua tuir  tempu hodi bele garante pás no susesu iha negosiasaun ", haktuir  iha deklarasaun ba jornalista sira, Jesús Dureza, konselleiru hosi  Prezidente filipinu, Rodrigo Duterte.

Sesárfogu ne’e deklara hafoin iha sesta-feira ne’e Governu Duterte liberta líder komunista rua, Benito no Wilma Tiamzon, hodi partisipa reuniaun iha Oslo.

Besik rebelde komunista filipinu 22 hasai hosi prizaun, iha movimentu ne’ebé kria " klima ida  pozitivu ho konfiansa" hosi parte ezekutivu Duterte no hatudu hakarak tebes atu  alkansa pás ho rebelde sira.

Razaun ida ne’ebé maka halo negosiasaun ronda uluk  la’o kleur iha tinan tolu nia laran tamba Prezidente filipinu , Benigno Aquino (2010-16) lakohi, atu liberta negosiadór komunista sira.

Parte rua sei hahú fila fali  iha Oslo intensaun atu alkansa akordu pás nian ho programa negosiasaun ba deklarasaun sesárfogu permanente, amnistia ba prezu komunista sira no hametin  mekanizmu ne’ebé garante hakotu konflitu armadu maka la’o besik sékulu ida ne’ebé kauza ema mate liu 30.000.

SAPO TL ho Lusa