DILI,
(ANTIL) – Golu úniku João Pedro Freitas iha minutu 53, lori kampiaun
Primeira Divisaun Liga Futebol Amadora (LFA) epoka 2015/2016 AD SLB tebe sai
FC. Aitana hosi jogu Tasa 12 de Novembro, Sabadu (20/08), iha Estadiu Municipal
Dili.
Golu
João Pedro Freitas nian ne’e akontese, hafoin aproveita pasajen bola hosi ninia
parseiru Danilson Araújo (11) ne’ebé halai hosi extremu karuk kuaze distánsia
12 hosi rede. Xutu ida ne’e ho velosidade maka’as no kruza entaun halo defeza
no baliza hakat sala, nune’e rezulta golu.
AD.
SLB hetan oportunidade barak atu hatama golu maibé kontra ataka hosi adversáriu
maka’as liu entaun sira falla beibeik iha ezekusaun bola. Iha minutu 20,
Danilson kedok bola hakat liu defeza no hakat liu tan baliza ne’ebé halai
hasoru nia atu salva bola maibé lá biban hatama golu tanba ho pozisaun offside.
Minutu
29, João Pedro husik xutu ida ho velosidade maka’as ba guarda rede adversáriu
maibé bola kesasar. Bola nakduir fali ba iha rede sorin parte liman karuk nian.
Dala
ida tan, João Pedro hetan oportunidade livre iha minutu 37 maibé tanba mentál
iha hela presaun nia laran entaun nia xuta ho hakfodak halo bola semo liu tiha
rede.
Danilson
mós hanesan. Tanba hakfodak ho presaun hosi adversáriu, nia mós lá konsege halo
golu iha minutu 42 maske nia hetan oportunidade livre. Bola ne’ebé nia tidin
semo liu tiha ninia tarjetu.
Hosi
parte Aitana, sira mós hetan oportunidade lubuk atu hatama golu maibé sempre
falla. Iha minutu 31, Salvador da Silva husik ninia xutu ida ba guarda rede maibé
bola lá semo ba alvu. Bola nakduir fali ba rede sorin parte liman karuk.
Iha
minutu 33, Alfredo Soares (16) aproveita bola kantu ida hosi ninia belun hodi
tidin liu ba rede inimigu maibé bola ás oituan entaun lá rezulta golu.
AD.
SLB kontinua tenta fó presaun no blokeia sira nia movimentu maibé sira konsege
ultrapasa maske lá hahoris golu. Minutu 35, Edit Sávio (9) okupa pozisaun di’ak
atu halo golu maibé tanba nia dada demais bola nune’e defeza mai hadau lalais
hosi nia ain. Hosi tribun leten, adeptus Aitana ho kakorok badak naruk hodi
fihir mai iha Edit ne’ebé atu lori esperansa ba Aitana. Maibé, oportunidade
ne’e, Edit soe saugati. Fogu..! Aitana kala lakon duni.
Iha
minutu 55, Hélder Valenti (15) koko tan baliza ho ninia xutu ne’ebé lais maibé
baliza kaer toman lalais. Lá kleur, minutu 66, Salvador da Silva (10) remata
baliza liu-hosi ninia xutu hosi extremu liman loos maibé falla. Baliza impede
imediata. Pluit…Pluit…Pluit..! Minutu 90 terminadu. Tempu to’o ona Aitana lulun
biti. SLB prepara án hasoru dezafiu iha terseira faze Tasa 12 de Novembro 2016.
Aitana
FC (5-2-3)—Nuno Sarmento (23/baliza), Narsicio Martins (3/defeza), Galucho de
Carvalho (4/defeza), Francisco Costa (2/defeza), Alfredo Soares (16/defeza),
Hélder Valenti (15/médiu), Zenildo Mozil (12/médiu), Calistro Pereira
(17/médiu), Salvador da Silva (10/médiu), Nélson Freitas (18/avansadu), Edit
Sávio (9/avansadu). Jogadór suplente ne’ebé tún kampu maka hanesan Mario
Sarmento númeru 8 pozisaun defeza troka númeru 17, Elias Ximenes númeru 32
pozisaun avansadu troka númeru 8, Florencio Pereira númeru 5 pozisaun defeza
troka númeru 16 no Nilton Freitas númeru 11 pozisaun médiu troka númeru 10. Treinadór:
João Samantha.
AD
SLB Laulara (4-1-4-1)—Fernando da Costa (21/baliza), Julião Mendonça
(3/defeza), Tomás Sarmento (24/defeza), Leopoldo A. Guterres (15/defeza),
Armando Varela (13/defeza), Filomeno Junior (23/médiu), João Paulo (8/médiu),
José Maria Oliveira (7/médiu), João Pedro Freitas (10/médiu), Danilson Araújo
(11/avansadu), Jeremias Baptista (12/avansadu). SLB só troka ema na’in ida
de’it. Nídio Ricardo Alves (5) pozisaun médiu troka númeru 24 (aleja iha minutu
35).Treinadór: José Martins.
Árbitru:
Início Fernandes
Juiz
linha 1: António de Carvalho
Juiz
linha 2: Francisco Pereira
Jornalista:
Xisto Freitas / Editor: Gantry Meilana – Foto: Jogadores SLB Laulara no Aitana
hadau malu bola atu hadau vitótia. Foto ANTIL/Xisto Freitas
Sem comentários:
Enviar um comentário