Estudu Diagnóstiku Foku ba Justisa Formál no Informál

DILI, (ANTIL) – Komisária Permanente ba Reforma Lejislativa (KRL) iha setór justisa, Melisa Silva Caldas hatete, estudu diagnóstiku sobre justisa iha Timor-Leste (TL) husi Komisaun Reforma Lejislativa (KLR) foku ba justisa formál no informál.

“Estudu diagnóstiku ida ne’e laharee de’it ba lejislasaun ne’ebé vigor maibé, regula kona-ba tribunál, ministériu públiku, prokuradoria jerál repúblika, defensoria públika, servisu sekretaria judisiál sira ne’ebé estudu hakarak identifika realidade sistema justisa formál iha Timor-Leste, haree saida mak hala’o ona no saida mak seidauk konsege hala’o”, Melisa informa iha nia intervensaun meza redonda, Kinta, (17/11) iha Timor-Plaza.

Kona-ba justisa fomál nia baze mak programa IV Governu Konstitusionál ne’ebé iha hanoin atu halo reforma ba setór justisa, liuliu ba independénsia tibunál, ministériu públiku, kona-ba asisténsia jusidiál ne’ebé daudaun ne’e hala’o hela ba sidadaun sira atu hetan justisa.

Estudu ne’e atu identifika nesesidade husi tribunál, instituisaun setór justisa seluk atu garante asesu ba sidadaun atu hetan justisa no direitu sira. “Atu halo estudu diagnóstiku ida ne’e, tanba komisaun iha membru na’in-3 no ladún sufisiente halo estudu ida ne’e, ami hato’o proposta ba sentru estudu sosiais (SES) husi Universidade Coimbra ne’ebé iha observatóriu permanente ba justisa, nu’udar instituisaun governu Repúblika Portugeza nian ne’ebé hala’o ona estudu barak kona-ba pluralizmu jurídiku, hala’o ona iha Makau, Mosambike no agora ita bolu sira mai hodi haree sistema iha Timor-Leste”, Melisa dehan.

Liuhusi investigadór ne’ebé halo estudu ida ne’e, KRL husu mós kolaborasaun husi Judicial System Monitoring Programme (JSMP). Ekipa téknika ne’e sei kompostu husi komisaun tékniku na’in-4, husi SES iha investigadór na’in-3  no JSMP na’in-2 ne’ebé la’ós foku ba área jurídika maibé mós sosiolojia.

“Maski ita ko’alia liu kona-ba lei maibé área sira seluk mós importante atu ita reflete iha estudu ida ne’e, aleinde sosiolojia ita sei haree ba finansa, oinsá mak jestaun finanseira iha tribunál sira”, Melisa salienta.

Estudu diagnóstiku sei fahe ba faze tolu no saida mak mak sei hetan husi estudu ida ne’e mak karateriza sistema justisa formál no daudaun ne’e funsiona. Banhira hakarak karateriza mak saida mak iha no ida ne’ebé falta atu kompleta.

“Ida ne’e importante tanba antes ita atu propoen buat ruma ba governu, talvéz iha ona proposta lei kona-ba organizasaun judisiária husi Ministériu Justisa, molok ita atu tama ba proposta lei ida ne’e, hakarak haree lai situasaun tribunál, sistema justisa formál mak ida ne’e ka la’e”, Melisa haktenik. (jornalista: Maria Auxiliadora; editora: Rita Almeida)

Foto: Komisária Permanente ba Reforma Lejislativa (KRL) iha setór justisa, Melisa Silva Caldas hamutuk ho seluk iha diskusaun ne'ebé hala'o iha Timor Plaza, Kinta, (17/11). Foto ANTIL/Egas Cristovão