PM Rui Gava Maturidade Kandidatu Lideransa Suku

DILI: Primeiru Ministru Rui Maria de Araújo gava maturidade kandidatu lideransa lokal no komunidade sira hodi garante prosesu eleisaun ba Lideransa Komunitaria ne'ebé hala'o dala rua, la'o ho hakmatek.

PM Rui dehan, kandidatu lider komunitaria sira ne'ebé kompete iha eleisaun suku hatudu duni sira-nia maturidade politika no eleisaun la'o ho hakmatek maske ho sistema eleisaun ne'ebé foun.

"Eleisaun Lideres Komunitaria iha Timor-Leste foin dahuluk hala'o ho prosesu ida ne'ebé foun. Suku sira mak organiza rasik prosesu ne'e," deklara  PM Rui ba jornalista sira hafoin hasoru malu ho Prezidente Republika, Taur Matan Ruak iha Plasiu Prezidente Nicolau Lobato, Kuarta (16/11).

PM Rui sente orgullu ba maturidade politika ne'ebé kandidatu sira hatudu.

"Kandidatu sira ne'ebé lakon iha primeira no segunda volta kontinua asegura situasaun ida hakmatek no fó nafatin sira-nia apoiu ba Xefe Suku eleitu. Ne'e valor boot ida ba ita tomak atu kongratula sira", deklara Xefe Governu ne'e.

Entretantu, PR Taur kongratula Ministériu Administrasaun Estatal (MAE) no PNTL tanba sira mós esforsa-an hodi lori prosesu eleisaun ne'e la'o di'ak to'o rohan. (*)

Tomé Amado - Editór: Tellukoro – Ola Timor

Foto: Primeiru Ministru Rui Maria de Araújo gava prosesu eleisaun lideransa komunitaria ne'ebé halo dala rua ho hakmatek. (Olatimornews Foto/Aquino Campos)