Pesoal Task Force Baku Inan Isin-rua

DILI: Pesoal Task Force Polisia Nasionál Timor-Leste Munisipiu Dili halo agresaun fiziku hasoru inan isin-rua, Seraifa Mendonca (23) tanba koko atu salva nia maun Antonio Goncalves ne’ebé hetan baku husi pesoal Task Force ne’e.

"Sira lori stick baku maka'as, baku iha ha’u-nia kidan, sei moras hela. Ha’u tur mós la di’ak. Ha’u isin-rua, agora fulan rua (2) ho balun," hatete Seraifa Mendonca ne’ebé hetan baku husi pesoal Task Force.

Kazu baku inan isin-rua ne’e akontese iha area Kaikoli, iha edifisiu SEPFOPE nia oin, bainhira PNTL hamutuk ho Serbisu Saneamentu no Orden Públiku Munisipiu Dili hala’o operasaun ‘kasa animal’ no negosiante sira ne’ebé faan sasan iha area refere.

Tuir sasin iha fatin akontesimentu katak, bainhira hala’o operasaun sira la konsege toman negosiante sira, nune’e pesoal Task Force hahú tama ba komunidade balun nia  uma hodi husu joven ida ho naran Antonio Goncalves.

Iha uma laran, sasin ne’e dehan, Antonio hatan ba pesoal ne’e no husu tanba sa mak sira mai buka nia. Maibé rona ida ne’e, pesoal Task Force hahú agresaun fiziku hasoru Antonio.

Haree hahalok pesoal Task Force ne’e, Seraifa Mendonca, alin husi Antonio halai hodi hako’ak nia maun ho hanoin katak pesoal ne’e sei para nia asaun baku ne’e.

Maibé, lae, pesoal ne’e  tebe Seraifa nia kabun kidun no lori stick baku nia kotuk laran.

Ho hahalok ne’e, ran sai husi Seraifa nia inus no ibun.

"Sira baku no tebe Seraifa, ran sai husi inus no ibun," hatete Xefe Juventude Kaikoli, Epi Maubere ba jornalista sira iha Kaicoli, Segunda (19/12) kalan.

Iha fatin ketak, membru  Polisia balun hatete, tuir informasaun ne’ebé nia simu katak pesoal PNTL halo atuasaun ba joven sira ne’ebé hemu lanu iha area ne’eba no joven ida mak hakilar malu ho polisia, tan ne’e pesoal ne’e ba baku.

Maibé, ikus mai, nia dehan, joven nia alin feto ida mak halai ba hakoak nia maun, nune’e pesoal polisia la finze (tidak sengaja) baku kona alin feto ne’e. (*)

Aquino Campos – Ola Timor - Editór: Tellukoro

Foto: Joven ida tula vitima Seraifa Mendonca (23) ne'ebe hetan baku husi pesoal Task Force ba Sentru Saude Vera Kruz hodi halo tratamentu saude. (olatimornews FOTO: Aquino Campos