Prezidente Filipina adia funu hasoru droga ba kombate korrupsaun iha polísia

Prezidente Filipina, Rodrigo Duterte, suspende ho temporáriu ninia "funu  kontra droga" atu bele  konsentra iha kombate ba korrupsaun polisiál hafoin omisídiu ba sul-koreanu ida iha kuartel-jerál Polísia Nasionál. 

"Ami tenki konsentra ami nia  esforsu iha limpeza interna, no bainhira problema resolve ona, Prezidente sei manda fali ami ba kombate  kontra droga sira. Maibé agora, laiha tan operasaun antidroga", hatete iha ohin  xefe polísia, Ronald dela Rosa,  liuhosi  diskursu iha  kuartel Campo Crame, Sidade Quezón.

Dela Rosa halo  anúnsiu ne’e hafoin iha domingu Duterte hatene katak polísia filipina ne’e  "korruptu to’o ba inportante sira" no promote sei foka ninia esforsu ba"hamoos" instituisaun ne’e, halo  investigasaun  totál ba ajente sira hotu ne’ebé  implika iha atividade ilegál sira.

Prezidente aproveita, maski nune’e, atu garante katak  hafoin  limpeza kuadru polisiál, "funu  hasoru  droga" sei kontinua to’o  mandatu remata iha 2022, no laós ba tinan ida, hanesan planeia ona iha uluk.

Dezde Duterte  assume  poder iha juñu 2016, ninia kampaña antidroga ne’ebé provoka ema mate liu  7.000  tanba deskunfia  liga ba estupefasiente, hosi sira mate 2.527 hosi  ajente sira ne’ebé deskunfia halo konfrontu ho suspeitu, tuir  dadus semana kouk nian.

Anúnsiu ne’e fó sai  hafoin  eskándalu ho kazu Jee Ick-joo, empresáriu sul-koreanu ne’eb’e hetan oho iha fulan tolu liubá.

Iha loron  18 outubru liubá, indivídu barak – inklui pelimenus polísia ida—lori Jee no ninia assistente iha rezidénsia emprezáriu ne’eb’e hela  iha  sidade Angeles, ho  kilómetru 100 hosi norte Manila, liuhosi  operasaun antidroga.

Sira na’in rua lori ba  Kampo Crame. Assistente  ikus mai hetan  livre, maibé sul-koreanu ne’e hetan oho iha loron ne’e kedas, tuir  investigasaun.

Viúva, Choi Kyung-jin, haktuir katak  sekestradór sira husu  resgate hodi  liberta ninia kaben, karik hakarak nia moris.

Kazu ne’e, hetan  investigasaun hosi  Senado hahú iha kinta-feira liubá, hamosu polémika hatudu  klima ba impunidade ne’ebé kria hosi  kampaña antidroga hosi Prezidente filipinu.

Kazu ne’e  ameasa boot ba  relasaun  ho Koreia do Sul, nasaun ida ne’ebé halo investimentu boot no konstante turista ba Filipina, haktuir  ajénsia Efe.

Iha kampaña ne’ebé lori  vitória iha eleisaun prezidensiál realiza iha 2016, Duterte promete "hamoos" Filipina hosi narkotrafikante no toxikodependente, argument katak  droga estraga jerasaun foun nasaun nian.

SAPO TL ho Lusa