PN HUSU HAPARA RÓ CHINA KAER IKAN IHA TASI MANE

Parlamentu Nasionál ejiji ba Governu atu hapara lalais kontratu ha Ró China hamutuk 15 ne’ebé hala’o atividade kaer ikan  iha Tasi mane.

PN rasik la konkorda ho akordu ne’e, tanba kontratu Governu nian ho Ró 15 husi China hala’o atividades peska iha tasi mane, ikan tonelada ida Governu Timor Leste hetan deit osan US$ 150.

“Ita imajina tok, se ikan tonelada ida mak US$ 150, entaun kilo ida ne’e centavus hira? Ida ne’e sai preokupasoens. Se ikan sai rekursu ida atu fó reseita mai ita-nia nasaun, mas ho kontratu ida hanesan ne’e, di’ak liu lalika halo,”relata Xefi bankada CNRT, Natalino dos Santos iha plenária PN, Segunda (20/02).

Natalino ejiji ba Ministru Agrikultura no Peska atu ba halo esklaresementu ba deputadu sira iha Parlamentu Nasionál kona ba Ró 15 ne’ebé mak halo peskas iha tasi mane.

“Ida ne’e ha’u haree hanesan la fó kontribuisaun. Tanba saida mak akontese hanesan ne’e, ha’u bele dehan katak, ida ne’e buat ida ne’ebé ladi’ak, tanba ikan tonelada ida fa’an de’it ho US$ 150,” lamenta Natalino.

Nia hatutan, pior liu tan, Ró 15 ne’ebé mak hala’o atividade peskas iha tasi mane ne’e, laiha ema ida atu kontrola, sira kaer ikan tuir sira nian hakarak de’it.

“Ita lahatene loron ida sira hetan tonelada hira no fulan ida hetan tonelada hira, no tonelada hira mak sira fa’an,” relata Natalino.

Alende ne’e, deputadu Antoninho Bianco husi bankada FRETILIN  dehan, nia mós rona informasaun katak, atividade peska iha tasi mane ne’e, ema kaer hotu ikan hiu sira ne’e.

Nia hatutan, atividade ida ne’e kuandu laiha kontrolu husi Governu, entaun ulun fatuk moras, tanba bele hamosu problema barak.

“Iha kontratu laran ne’e tenki hatete katak, ikan ida ne’ebé mak bele kaer, la’os ikan sira ne’e ba kaer hotu, ita ulun moras, sa tan nia folin US$ 150 kada toneladas, ida ne’e ha’u hanoin ha’u mós preokupa oituan,” dehan Antoninho Bianco.

Nune’e mos, deputada Josefa Alvares P. Soares husi bankada FRETILIN husu ba Ministério Agricultura e Pescas (MAP)  atu  halo esklaresmentu iha PN konaba Ro Peskas 15 ne’ebé kontrata husi China mai halo peskas iha Timor-Leste (TL).

“Ha’u hanoin komisaun kompetenti bele bolu dala ida tan Ministru ne’e, maibe saida mak nia hatete dehan katak, Ro ne’ebé mai halo peskas kansela tiha ona sira nian peskas no agora dadauk iha ekipa ida interministerial  ne’ebé halo hela inkéritu ho kompañia. Ne’ebé ha’u hanoin katak, diak liu ita bolu Ministru mai para hodi hatene lia los kona ba asuntu ida ne’e,”Deputada Josefa Alvares P. Soares ba plenaria iha PN.cos/Car

Jornal Nacional Diário