Austrália sei hametin liu tan seguransa besik ba parlamentu iha Camberra

Primeiru ministru australianu, Malcolm Turnbull, ohin hateten katak sei aumenta tan prezensa polisiál iha parlamentu Camberra hafoin atentadu iha Londres hamate ema na’in lima, inklui atakante nomós ema na’in sanulu maka kanek. 

“Austrália-oan sira bele hatene lolos katak ami-ninia ajénsia ohin loron iha – hanesan mos lorloron – serbisu hela de’it atu halo Austrália-oan sira sente seguru”, dehan Turnbull iha konferénsia imprensa.

“Ami hatene kona-ba vulnerabilidade hosi fatin konsentrasaun bobot no risku ne’ebé reprezenta atakante solitáriu nu’udar terorista iha Londres”, tenik primeiru ministru Austrália, hodi hato’o ninia solidariedade ba Reinu Unidu.

Tuir balansu ofisiál foun, ema na’in lima mate no 40 kanek, bainhira akontese atake terorista besik iha parlamentu britániku, Londres, bainhira ema ida ne’ebé lori kareta soke ema sira la’o iha ponte Westminster nia leten nomós sona polísia ida. 

Ema sivil tolu maka mate, polísia ida no atakante maka hetan tiru hosi forsa seguransa horisehik kalan, tuir xefe unidade antiterorista polísia Londres nian, Mark Rowley.

Austrália hasa’e tan sira-ninia nivel alerta terorista hosi "natoon" ba "maka’as" iha fulan setembru 2014 – ba dahuluk hafoin tinan sanulu nia laran --, haforsa ona seguransa no aprova mos lei antiterorista barak, hodi nune’e labele mosu tan atentadu iha sira rain, ne’ebé sai nu’udar atake izoladu.

Hahú hosi ne’ebá, Austrália sai hanesan fatin ba atentadu maka’as haat no konsege hapara planu atentadu 12 seluk.

SAPO TL ho Lusa