Deputadu preokupa laiha espasu trata BI Portugal

Deputadu Parlamentu Nasional husi bankada PLP, Mericio Akara, preokupa ho sidadaun Timor-oan ne’ebé trata Bilhete Identidade (BI) Portugal, laiha espasu seguru tamba forma de’it iha estrada ninin.

Objetivu husi Timor oan sira ne’ebé ba halo tratamentu BI Portugal ne’e hodi ba servisu iha Inglaterra no Irlanda.

“Ita-nia maun-alin sira ne’ebé atu trata dokumentu, loron-loron iha Estrada ninin iha embaixada Portugal nia oin, bainhira sira trata dokumentu, sira laiha espasu, sira hamri’ik de’it forma iha Estrada ninin ne’ebé mak kaundu ita haree didiak ne’e ladun  dignu ba sira, pior liutan agora tempu bai-loron, loron manas sira hamrik de’it iha liur, lahatene bainhira udan tun sira atu hamriik tan iha ne’ebé,” haktuir deputadu Mericio Akara, iha nia intervensaun ba plenaria, Segunda (30/10/2017).

Ho preokupasaun ne’e, nia husu ba ministériu relevante atu bele komunika ho parte embaixada Portugal iha Timor-Leste, atu bele kria kondisaun ne’ebé dignu.

“Ministru kompetente, se bele halo komunika ho embaixada Portugal nian, para bele hahú halo planu ruma, atu nune’e ita-nia maun-alin sira kuandu trata dokumentu ne’e iha espasu no iha dignidade,”katak Mericio.

Hatan ba preokupasaun ne’e, Ministru Prezidensia no Ministru Konsellu Ministru sira, Adriano do Nascimento, hateten, iha tempu badak sei hatutan informasaun ne’e ba ministeriu relevante, atu bele koordena ho embaixada Portugal atu bele toma medida. Say

GMN TV | Grupo Média Nacional