Loron Finadu Mai ona, Pasageirus Susar Atu Asesu Transporte Publiku

Kada tinan sarani Katolika sira komemora loron finadu hodi ba visita matebian sira nia rate. Ida ne’e nudar atividade ritual ne’ebe mak sai ona fiar ema Katolika, hodi halo tuir. Situasaun ida ne’e halo komunida barak fila ba sira nia knua hodi bele ba vizita familia sira ne’ebe mak husik ona mundu ida ne.

Komunidade sira ne’ebe halao moris iha capital hanesan funsionariu publiku, funsionariu NGO, estudante no seluktan, maioria fila ba sira nia knua ou municipiu, maibe komunidade barak mak hasoru difikuldade tanba susar atu asesu transporte publiku iha tempu refere.

Hela deit loron rua tama ba finadu nune’e iha terminal iha Dili laran, nakonu ho ema hodi hein transporte publiku, hodi bele halo viagen ba ida idak nia horik fatin.

Jornalista TAFARA.TL konsege dadalia ho pasageirus husi Municipiu Viqueque, Celestino de Fatima Cabral hateten bainhira iha loron boot tenke esforsu an hodi hein transporte publiku (Bis) husi Dili ba Viqueque durante oras ba oras.

Hau mai jam 3 kedas to agora, atu ba Viquequ, bis iha maibe ema mak barak liu, nune’e Bis sira labele akumula ema hotu. Iha loron baibain ne’e normal ita hein bis lalais deit, maibe iha loron boot sira ne’e susar los atu hetan transporte hodi bele asesu”, tenik Celestino.

Pasageirus ne’e salienta liu tan katak, husu ba parte kompetente atu iha loron boot, oinsa bele prepara kondisaun ne’ebe diak ba nia povu sira, hodi nune bele halo viagen ne’ebe diak ba iha municipiu sira.

Iha fatin hanesan pasageirus, Ana Lubelia Sarmento do Rosario da Costa, ne’ebe hein hela bis hodi halo viagen ba Municipiu Baucau, mos lamenta katak kada tinan tenke hein Bis hanesan ho situasaun ida agora.

“Tinan tinan kuandu loron bo’ot ona, hau tenke hein Bis hanesan husi dader to lorokraik antes dala ruma mos hein to loron tomak, labele hetan bis nune’e hau tenke fila ba uma, aban mak mai fali hein Bis,” Esplika Ana ho laran triste iha terminal Bekora.

Motirista Dili ba Viqueque, <strong>Guelhermino Aparício hateten katak iha tempu finadu sira tenke ulun moras ho pasageirus tamba barak demais.

“Iha loron boot liu-liu finadu ne’e, ami tenke ulun moras uituan ho pasageirus tamba barak demais nune’e ami la hetan fatin atu tula tan sira no at liu mak sira tenke tabele tuir kapon leten, ami hare’e ne’e risku tebes, ami tenke koalia maibe sira ulun tos hodi lakohi atu tun. situasaun hanesan ne’e ami sempre hasoru tinan tinan,” esklarese Aparicio.

Journalista TAFARA.TL tenta ba fatin Diresaun Nasional Transporte Terestre hodi korfirma konaba total numeru transporte publiku ne’ebe regista, maibe labele hetan atendementu husi parte refere tamba Diretor Diresaun la iha fatin no informsaun ne’ebe hetan katak Diretor Nasional Transporte Terestre, halo ona viagen  ba municipiu hodi komemora loron finadu.

Komunidade iha esperansa boot, atu governu bele fasilita transporte publiku ba nia povu, hodi nune’e sira bele hamutuk hodi komemora loron finadu iha sira nia knua. Povu fo fiar ona ba ukun nain sira, espera aspirasaun povu nian bele sai realidade.

Jesuino Marcal de Jesus | TAFARA.TL | Editor: Zevonia Vieira | 31.10.2017

Foto: Terminal Bekora ho foto Jesuino Marçal de Jesus