Governu Sei Akumula Hanoin Diak Sira

DILI, (TATOLI) - Prezidente Partidu Demokrátiku (PD), Mariano Assanami Sabino hateten Governu ida ne´e kontinua nakloke hodi rona saida maka ema hotu hanoin, partidu seluk hanoin no bankada seluk hanoin, para bele hetan programa no planu ida kualidade ne´ebé reflete ema hotu nia hakarak.

Tuir Assanami, partidu ne´e hanesan instrumentu ida, maibé liberta povu hosi kiak no mukit maka objetivu. Tanba ne´e, karik buat ruma ne´ebé presiza kurisi, governu sei rona no governu aseita para kurisi.

“Lideransa sira iha Parlamentu ne´e ita mesak maun alin de´it no ita mesak kolega de´it, tanba ne´e, ita nia komunikasaun ne´e la para. Ita sempre ko´alia ba malu nafatin katak povu ida ne´e la fó votus boot ba partidu ida. Fó votus oituan-oituan ba iha partidu sira entaun ita lider tenke matenek no tenke iha responsabilidade para labele husu ba povu atu hili fali tan partidu sira iha tempu badak (eleisaun antisipada),” nia hato´o kestaun ne´e ba jornalista sira iha sede Comité Central da FRETILIN (CCF), Fatuhada, Dili, Kinta kalan, hafoin hala´o reuniaun hamutuk ho kuadru FRETILIN kona-ba programa Sétimu Governu Konstitusionál ne´ebé sei aprezenta ba Parlamentu Nasionál iha semana oin.

Assanami fó sai katak, iha Konsellu Ministru, sira deside ona planu ne´ebé mak Sétimu Governu Konstitusionál sei hala´o ho karater planu kontinuasaun hosi governu ne´ebé lidera hosi Xanana Gusmão.

“Úniku kompromisu ne´ebé ita atu halo hamutuk maka Planu Estratéjiku Dezenvolvimentu Nasionál (PEDN). Ne´e katak ita halo kompromisu ba povu ne´e ko´alia ba programa no planu oinsá atu hadi´a povu nia moris liuhusi dada bee-moos ba povu, halo no hadi´a estrada, dada eletrisidade ba povu ne´ebé seidauk asesu eletrisidade, halo uma ba kbiit laek sira no kontinua mega projetu hanesan polítika ida diversifika ekonomia iha futuru.”

“Governu ida ne´e mós tau konsiderasaun ás ba eis Komandu ba Luta Libertasaun, Kay-Rala Xanana Gusmão liuhusi proposta atu lidera Alta Autoridade ba fronteira tasi, rai maran, aero nó mós ba projetu Tasi Mane.” Ministru Estadu rekursu minarais  sétimu governu ne’e hakotu lia.

Jornalista: Xisto Freitas | Editór: Manuel Pinto

Foto: Mariano Assanami Sabino