Portu Tibar Termina Ona Interidasaun husi BM

DILI, (TATOLI) - Inkéritu ne’ebé Governu halo ba International Finance Corporation nu’udar membru pertense ba Banku Mundiál (BM) konfirma katak China Harbour Engineering Company (CHEC, nu’udar parte ne’ebé manan ba konstrusaun Portu Tibar ne’ebé antes ne’e impede  (interidada ou debar-iha lia-inglés) husi Banku Mundiál termina ona nia nia impedimentu iha Janeiru 2017 no nunka aplika ba portu.

Tuir akordu kontratu konsesaun, Timor Port S.A maka únika responsavel perante ba Estadu kona-ba dezeñu, ko-finansiamentu, konstrusaun no operasaun ba Portu, tenke kumpre ho obrigasaun tomak no padraun ne’ebé di’ak inklui tékniku espesifikasaun rigorozu banati tuir Kontratu Konsesaun.

Timor Port S.A bele halo sub-kontratu independentemente ba servisu konstrusaun no operasaun ba entidade seluk no asegura entidade sub-kontratada kumpre ho espesifikasaun tékniku referidu iha Kontratu Konsesaun.

Tanba ida-ne’e, konsesionária lansa independentemente konkursu internasionál no konklui tiha ona konkorsu ne’e ho kompañia selesionadu CHEC nu’udar parte ne’ebé manán ba konstrusaun ba Portu Tibar iha data 12 Dezembru 2017.

Tuir komunikadu husi Ministériu Planu no Finansa (MPF) katak papél Governu maka atu asegura konsensionária no nia sub-kontratór sira kumpri ho akordu Kontratu Konsensaun ne’ebé iha mekanizmu sufisiente hodi proteje Governu bainhira iha fallansu ruma akontese.

“Tanba razaun ida-ne’e, Governu estabelese Unidade Jestaun Portu Baia Tibar hodi dedika totalmente ba implementasaun projetu ne’e, ho profisionais sira ho esperiénsia ne’ebé di’ak, tantu nasionál no internasionál, ne’ebé kombina ho koñesimentu (background) nesesáriu hodi jere akordu Kontratu Konsensaun durante faze konstrusaun, téknika, seguransa, saúde no ambiente, no legál”.

Luihusi konkursu inetrnasionál, konsórsiu EGT Engenharia & FASE Estudos e Projetos (“Engenheiro Independente”) ne’ebé selesionadu hodi hala’o supervizaun independente ba dezeñu no konstrusaun portu nian.

“EGT & FASE hanesan konsórsiu husi empreza fiskalizasaun internasionál ho esperiénsia barak iha supervizaun portu nian iha nasaun oioin. Sira sei verifika katak Konsesesionária kumpri rekerimentu hotu bazeia ba akordu Kontratu Konsensaun, inklui kompleta verifikasaun ba dezeñu no superviziona atividade konstrusaun hotu. Engenheiro Independente sei asegura katak Governu Timor-Leste kumpri atempadamente obrigasaun hotu bazeia ba akordu kontratu konsensaun hodi bele halo prosesu dezenvolvimentu projetu la’o ho di’ak”, refere komunikadu ne’ebé dirije ba Tatoli, ohin.

Durante faze konstrusaun, iha projesaun katak sei iha servisu fatin liu 500 maka loke, maioria ba sidadaun no rezidente permanente Timór-oan. Ida-ne’e nu’udar kompromisu husi Konsesionária no Governu atu asegura tarjetu ida nee, la importa kontratór ida ne’ebé mak Konsesionária kontrata (hili) hodi harii Portu.

“Finalmente, implementasaun Projetu PPP lori investimentu privadu boot liu iha setór infrastrutura públika mai Timor-Leste, no ida ne’e mós hatudu hela sinál ba investór seluk katak Timor-Leste nu’udar fatin atrativu hodi bele hala’o negósiu”.

Governu Timor-Leste deside kleur  ona atu dezenvolve portu foun iha parte oeste Dili hodi bele serve nasaun ho tinan naruk tuir modelu Parseira Públiku-Privada (PPP).

Liuhusi  konkursu internasionál, Governu selesiona Bolloré Group (Parseiru Privadu) atu dezenvolve portu foun (green field port) iha Baia Tibar liuhusi modelu dezeñu, harii, ko-finansia, opera no transfere (Design Build Finance Operate & Transfer/DBFOT). Bolloré Group nu’udar kompañia Francés iha naran iha nivél mundiál espesializada iha konsensaun portu no lojístika, no agora daudaun opera terminál kontentór hamutuk 16 iha nasaun oin-oin. Atu hala’o dezenvolvimentu portu foun Governu asina akordu (kontratu) ho Timor Port S.A. (kompañia ne’ebé rejistradu iha Timor-Leste no na’in husi Bolloré Group) iha loron 3 juñu 2016 ba konsensaun tinan 30 nian.

Depois períodu konsensaun, Timor-Port S.A sei transfere filafali portu internasionál ne’e (Portu Tibar) ba Governu Timor-Leste.

Portu Baia Tibar sei sai nu’udar “State-of-the-art port” ho ekipamentu modernu hodi bele garantia movimentu rápidu no efisiente iha kontentór no kargu. Portu foun sei bele akomoda ró ahi boot liu Portu Dili no sei asegura kustu ba Freight (karregamentu) ne’ebé sei hamenus presu konsumidór.

Avaliasaun detallu ba impaktu ambientál no sosiál hala’o husi parte konsesionária banati tuir padraun internasionál, inklui medida hodi evita, hamenus (mitigate) ka halo balansu ba impaktu ambientál.

Projetu ne’e implementa nu’dar Parseira Públiku-Privada (PPP) atu lori esperiénsia no “teknolojia know-how” husi operadór portuáriu nivel mundiál ba Timor-Leste, introdús inovasaun, promove efisiénsia operasionál no garantia prestasaun servisu ne’ebé di’ak ba públiku, no importante liu, Governu bele transfere risku boot ba parseiru privadu, inklui risku konstrusaun atrazu, kustu exesivu, tráfiku, efisiénsia operasaun no seluk seluk tan.

Modelu PPP kria mós insentivu adekuadu tanba konsesionária maka sei opera portu durante tinan 30 nia laran, ida-ne’e maka sei sai sira-nia interese (responsabilidade) hodi garantia halo konstrusaun ho kualidade ne’ebé di’ak.

Jornalista: Maria Auxiliadora | Editór: Manuel Pinto

Imajen: Dezeñu Portu Baia Tibar. Foto/Mídia MPF.

Atu bele hatene liután kona-bá Lista atuál ba pesoál singulvr no koletiva ne’ebé inelejível husi Banku Mundiál, bele haree tuir iha link ida-ne’e: http://web.worldbank.org/external/default/main?theSitePK=84266&contentMDK=64069844&menuPK=116730&pagePK=64148989&piPK=6414898