Povu Mantein Harmonia-Paz, TL Naran Sei Morin Liu Tan

DILI – Bazeia ba realidade situasaun politika neebe lao iha rai laran, maibe povu nafatin mantein harmonia, paz, situasaun nee mak ultrapasa hatudu katak Timor-Leste nasaun sei morin liu tan.

Lia hirak nee hatoo husi Xefe Bankada PLP hanesan mos Prezidente Komisaun B, Fidelis Magalhaes hatete, hanesan Prezidente komisaun B, hatoo parabens ba sidadaun  hotu, tanba apezar ho politika neebe mak lao makas loos iha rai laran, maibe povu mantein kalma no harmonia, hahalok sidadaun nee mak ema hotu nia  hakarak.

"Haree agora povu sira kria hakmatek no harmonia iha ita nia rain, neebe ita ultrapasa ho situasaun politiku neebe mak agora lao dadaun mak ita nia nasaun naran sei morin liu tan, buras liu iha futuru. Tanba ami dezezu nafatin ba sidadaun hotu iha loron boot ida nee,” Fidelis ba STL Sesta (22/12/2017) iha Bankada PLP PN.

Nia husu ba joven sira iha loron boot natal-tinan foun labele nakar, hemu tua tenke koidadu aan atu bele fo haksolok ba familia iha nasaun ida nee. Nia nafatin dezezu ba Timor oan hotu, fiar katak ho situasaun hakmatek neebe povu kria, ba tinan 2018 mai mos sei nafatin lao diak liu tan.

Nunee mos Xefe Bankada Fretilin Francisco Branco katak Fo parabens ba povu iha Timor laran tomak, tanba povu sira maduru liu ema politiku sira. Maduru neebe povu hatudu nee iha kedas sira fo votus, neebe eleisaun liu ona. 

Guilhermina Franco | Suara Timor Lorosae