Ministra Justisa timoroan agradese apoiu portugés ho europeu ba área públiku nasional

Ministra Justisa timoroan felisita, iha loron-kinta ne'e, apoiu hosi Portugal no hosi Uniaun Europeia iha prosesu hodi hametin adminitrasaun públika ho justisa iha Timor-Leste, liuliu kona-ba modernizasaun hosi serbisu sira ne'ebé iha.

Ângela Carrascalão hatete iha loron-kinta ne'e katak Portugal no mós Uniaun Europeia hanesan parseiru importante ne'ebé "aposta nafatin iha dalan no instrumentu fundamental sira hodi hametin governasaun di'ak iha Timor-Leste".

Governante timoroan ko'alia iha loron-kinta ne'e, iha Díli, iha serimónia entrega ba Timor-Leste ekipamentu oioin ne'ebé sei permiti hasai billete identidade sira iha munisípiu neen iha nasaun, iha ámbitu hosi programa europeu ida apoiu nian hodi hametin Governasaun Dijital no hosi serbisu públiku sira.

Entrega ekipamentu ho karreta sira marka ona lansamentu hosi projetu nasional iha Timor-Leste hosi programa ida boot liu, selu hamutuk hosi Portugal ho Uniaun Europeia, diresionadu ba autoridade timoroan sira ho ba Nasaun Afrikanu sira ho Lian Ofisial Portugés (PALOP).

Projetu hosi Apoiu hodi Hadi'a Kualidade no Hakbesik Serbisu Públiku sira iha PALOP/Timor-Leste (PASP/PALOP-TL) sei permiti, iha kazu Timor-Leste nian, hasai Billete Identidade iha munisípiu neen, iha investimentu dahuluk ida iha ekipamentu ho folin besik dolar rihun 400 ne'ebé entrega semana ne'e iha Díli ho Liquiçá, iha oeste kapital nian.

Ângela Carrascalão felisita knaar hosi Camões hodi hala'o programa no apoiu adisional hosi Ajénsia ba Modernizasaun Administrativu, entidade "ne'ebé sertifika supervizaun tékniku hosi projetu".

Nia hatete katak projetu iha importánsia partikular "ba modernizasaun no universalizasaun hosi serbisu sira ba emisaun Billete Identidade nian iha Timor-Leste", kontribui hodi lori ba nasaun tomak emisaun hosi dokumentu.

"Aumentu hosi emisaun Billete Identidade nian ba munisípiu tomak sei kontribui hodi fasilita nia emisaun, provome proximidade hosi serbisu sira Justisa nian iha besik sidadaun sira, planu ne'ebé konfigura objetivu prinsipal ida hosi governasaun iha área justisa nian", nia hatete.

"Modernizasaun hosi serbisu sira justisa nian, fó dotasaun ida ho transparénsia no efikásia maka'as no reforsu hosi governasaun dijital" hanesan tama iha prioridade sira ezekutivu nian ne'ebé kompromete iha implementasaun hosi Governu Eletróniku.

"Ho inísiu hosi projetu, governasaun di'ak sei reforsa iha Timor-Leste, nune'e mós funsionamentu di'ak, transparénsia no proximidade hosi serbisu sira justisa nian iha sidadaun tomak", nia hatete.

Material ne'ebé entrega inklui karreta foun rua ne'ebé ekipadu ho komputador sira, skanner sira, impresora sira ho kámara dijital sira no ne'ebé sei uza hodi fasilita emisaun hosi Billete Identidade ba sidadaun timoroan tomak iha munisípiu oioin iha nasaun ne'e.

Projetu PASP PALOP/TL iha investimentu global ida besik euro millaun 5,8 (millaun lima hosi UE no millaun ida hosi Camões - Instituto da Cooperação e da Língua).

Supervizaun téknika hosi projetu kaer hosi Ajénsia ba Modernizasaun Administrativu, I.P. (AMA, I.P.).

Iha Timor-Leste, parseiru estratéjiku ba implementasaun hosi PASP maka Diresaun Nasional ba Rejistu sira ho Notariadu hosi Ministériu Justisa nian.

Iha nasaun parseiru sira seluk maka INFOSI (Angola), NOSi (Cabo Verde), CEVATEGE (Guiné Bissau), INTIC (Mosambike) ho INIC (São Tomé & Prínsipe), aleinde entidade responsável sira hodi hala'o projetu nasional sira ne'ebé selu hosi PASP PALOP-TL.

SAPO TL ho Lusa