PR Sei Buka Tempu Nomea Kandidatu Membru Governu Pendente

DILI, (TATOLI) – Primeiru-Ministru, Taur Matan Ruak, hateten Prezidente Repúblika (PR), Francisco Guterres Lú Olo, sei buka tempu atu nomea kandidatu membru Governu sira ne’ebé to’o ohin loron seidauk toma pose, maibé seidauk determina tempu loloos.

Taur hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin enkontru ho Xefe Estadu hodi ko’alia kona-ba prosesu preparasaun Orsamentu Jerál Estadu 2018 nomós lista kandidatu membru Governu ne’ebé pendente.

Xefe Governu hatutan bainhira Prezidente buka tempu ba tomada pose, sei fó sai ba públiku atu akompaña prosesu refere.

Taur tenik tomada pose ba kandidatu membru Governu na’in tolu hanesan Alfredo Pires, Rogério Mendonça no Samuel Marçal ne’e laiha problema.

Entretantu, kandidatu membru Governu na’in sia to’o ohin loron seidauk hetan tomada pose, tanba deskonfia involve iha kazu partisipasaun ekonomia.

Jornalista: Xisto Freitas | Editora: Rita Almeida

Imajen: Primeiru-Ministru, Taur Matan Ruak, ko'alia ho jornalista sira iha Palásiu Prezidensiál Bairru Pité, ohin. Foto Tatoli/Xisto Freitas