Pelumenus labarik ho adolesente na'in 45 mate iha atentadu sira iha Sri Lanka, haktuir hosi Unicef

Pelumenus labarik ho adolesente na'in 45, inklui bebé na'in ida ho fulan 18, mate ona iha atentadu sira iha loron-domingu iha Sri Lanka ne'ebé halo ona ema na'in 310 mate, anunsia hosi Fundu ONU nian ba Infánsia (Unicef) iha loron-tersa ne'e.

"Atualmente iha total ida hamutuk labarik ho adoleste na'in 45 mate (...) no númeru ne'e sei bele aumenta", hatete hosi Christophe Boulierac, porta-vós ida hosi Unicef.

Iha konferénsia imprensa, Boulierac refere ona katak joven sira seluk "kanek no luta hela ba sira nia moris".

Tuir Unicef, hosi labarik sira ne'ebé mate, na'in 27 iha igreja Katuwapitiya iha Negombo, iha kilómetru balun hosi norte kapital Colombo, ne'ebé iha labarik na'in 10 kanek.

Christophe Boulierac hatete mós katak labarik no adolesente estranjeiru na'in lima mate ona iha atentadu sira, la fó sai nia nasionalidade ka fatin mate nian.

Iha loron-segunda, Unicef anunsia ona katak Governu Sri Lanka konfirma ona katak iha Batticaloa mate ona labarik na'in 13 inklui bebé na'in ida ho fulan 18, no labarik ho adolesente na'in 15, entre tinan 7 to'o tinan 16, kanek.

UNICEF indika ona katak labarik na'in 20 tama iha ospital ida Colombo nian, iha kapital nasaun nian, no na'in haat iha unidade sira kuidadu intensivu nian.

"Ami kondena violénsia ne'e iha termu ne'ebé maka todan tebes. Laiha labarik ida maka tenki esperimenta situasaun ida ne'ebé triste tebes no laiha aman-inan sira ne'ebé maka lakon sira nia oan iha sirkunstánsia sira ne'ebé aat tebes", afirma hosi Boulierac.

Esplozaun ualu iha loron-domingu oho ona, pelumenus, ema na'in 310, entre sira maka portugés na'in ida hosi Viseu, no halo ona ema na'in 500 resin kanek.

Númeru hosi ema sira ne'ebé maka polísia kaer tanba deskonfia iha ligasaun ho atake sira aumenta ba na'in 40, haktuir hosi porta-vós polísia nian, Ruwan Gunasekera, ba ajénsia Efe.

Responsável hosi polísia afirma tiha ona katak autoridade sira atribui atake sira ne'e ba grupu estremista islámiku lokal, National Thowheeth Jama'ath, maski konsidera katak grupu iha apoiu iha nível internasional.

Kapital nasaun nian, Colombo, hetan ona esplozaun pelumenus dala lima: iha hotel luxu haat no igreja ida.

Igreja rua seluk hetan mós esplozaun, ida iha Negombo, iha norte kapital nian no ne'ebé iha prezensa maka'as hosi ema katóliku nian, no ida seluk iha leste nasaun nian.

Esplozaun daualuk no ikus akontese iha kompleksu ida vivenda sira nian iha zona Dermatagoda.

Esplozaun neen dahuluk akontese "kuaze iha tempu hanesan", iha tuku 08:45 (oras lokal) loron-domingu nian, hatete hosi fonte polísia sira ne'ebé maka haktuir hosi ajénsia internasional sira.

Lusa | SAPO TL