Ekipa SEFOPE Sei Aprezenta Polítika Ba Mudansa Saláriu Mínimu

DILI, 30 abr 2019 (TATOLI) – Ekipa traballu Sekretáriu Estadu ba Formasaun Profisionál no Empregu (SEFOPE) iha tempu badak sei finaliza no aprezenta polítika ba mudansa saláriu mínimu ba Konsellu Ministru hodi hetan apresiasaun.

“Ita atinje ona porsentu 95 depois hein de’it ona aprovasaun husi Konsellu Ministru, kuandu ami bá aprezenta sira fó ona apresiasaun, ita bele hahú ona polítika ida ne’e”, afirma SEFOPE, Julião da Silva, iha ámbitu komemorasaun loron mundiál traballadór sira-nian ne’ebé monu iha 1 maiu, au mezmu tempu selebra mós ezisténsia International Labour Organization (ILO) da-100 iha mundu no prezensa ILO iha Timor-Leste ba 16 iha Delta Nova, ohin.

Bainhira husu sobre montante husi saláriu mínimu ne’e SEFOPE dehan seidauk bele fó sai no hetan ona aprovasaun maka ema hotu bele hatene, maibé klaru katak nia sei liu saláriu mínimu agora maka $115.

Prezidente Kámara Komérsiu Indústria Timor-Leste (CCI-TL), Óscar Lima, hatete sobre saláriu mínimu ne’e diskute ona iha 2016 no hotu-hotu iha ona akordu ida para oinsá hasa’e saláriu mínimu ne’e, maibé iha parte seluk CCI-TL ezije mós ba Governu no sindikatu traballadór atubele prepara ema ne’ebé nia kapasidade atu simu saláriu mínimu.

“Kuandu hasa’e saláriu mínimu ne’e ami-nia empreza hasa’e tiha ona, mínimu balu ba dolar 200 no 200 resin. Bainhira ami haree nia kualidade di’ak ona ami tenke hasa’e nia vensimentu para ema seluk labele mai bolu tiha. Balu nia vensimentu dolar 300, 400 ne’e  ami hasa’e tanba nia di’ak ami ta’uk atu lakon fali traballadór ne’e”.

Tanba ne’e dahuluk tenke haree kualidade serbisu no mós ábitu ida maka bainhira ema ruma mate traballadór tenke bá to’o semana ida.

“Ne’ebé ha’u-nia kompañia rasik fó ona regra se bá asiste mate fila kedan laiha direitu serbisu loron tolu ne’e, só inan-aman ou banin”.

Kona-ba mudansa ba númeru saláriu mínimu nian, Óscar Lima dehan sei segredu no lori bá Konsellu Ministru aseita tiha maka fó sai, tanba saláriu mínimu ne’e la’ós ko’alia de’it ba setór privadu nian de’it, maibé iha ligasaun mós ho Governu ne’ebé iha pakote ida boot tebes, traballadór ne’e husi Governu, ne’ebé Governu iha nia direitu atu pronunsia ida ne’e.

Sekretáriu Jerál Konfederasaun Sindikatu Timor-Leste, José da Conceição da Costa, dehan iha fulan kotuk konklui ona rekomendasaun kona-ba revizaun ba saláriu mínimu, ne’ebé SEFOPE komprometidu ona atu  iha maiu no juñu nia laran ne’e atu aprezenta ba Konsellu Ministru.

“Agora atu kompleta informasaun liuliu dadus sira kona-ba revizaun ba saláriu mínimu ne’e, Konsellu Nasionál Traballu kontinua serbisu, ita haree husi aspetu nesesidade vida digna traballadór sira-nian, ita haree kona-ba hahán, hemu, hatais, uma, komunikasaun depois informasaun ka edukasaun, komponente hitu ne’ebé ami deside tiha ona depois mós atu haree kona-ba produtividade setór sira iha rai-laran, tanba dala barak ema hatete saláriu iha ligasaun forte ho inflasaun”.

Tanba ne’e iha semana oin Konsellu Nasionál Traballu sei kontinua buka dadus atubele kompleta hodi sai hanesan razaun fundamentál hodi aprezenta kona-ba revizaun ba saláriu mínimu ne’e no iha desizaun Konsellu Traballu ne’ebé lei fó kompeténsia atu halo rekomendasaun sobre saláriu ne’e, foti ona desizaun no hein de’it SEFOPE aprezenta iha Konsellu Ministru.

“Prinsípiu iha mudansa, mas nia kuantidade ba saláriu mínimu ne’e hira, depois Sekretáriu Estadu aprezenta maka ita sei haree. Maibé husi parte ami-nian, sindikatu, hanoin katak saláriu mínimu atuál ne’e la fó biban ba traballadór sira atu hadi’a nia moris”.

Jornalista: Maria Auxiliadora | Editora: Rita Almeida

Imajen: Sekretáriu Estadu ba Formasaun Profisionál no Empregu Julião da Silva, Imajen/Egas Cristovão