Viqueque Tenke Prepara Simu Kadoras Greater Sunrise

DILI, 23 maiu 2019 (TATOLI)-Administradór Munisípiu Viqueque, Gregorio Hendrique, hatete, munisípiu Viqueque tenke prepara ona iha setór agrikultura, infraestrutura, tékniku no rekursu umanu, atu bele simu polítika governu da-ualu nian atu dada kadoras mina matan greater sunrise nian mai Beaço, Viqueque.

“Se ita fó han ema rihun ida-resin ne’e loron ida ita fó han hira, tékniku ne’e na’in hira, badaen na’in hira, buat barak loos. Hotu-hotu ita tenke prepara. Ne’ebé agora iha munisípiu Viqueque, ami tenke haree iha kooperativa, agrikultura no profisionál ne’ebé prontu atu uza iha munisípiu Viqueque,” hateten  Administradór Gregorio Hendrique, ohin, iha edifísiu SEFOPE, Caicoli, Dili, bainhira partisipa iha aprezentasaun rezultadu projetu pilotu ba programa Empregabilidade no Oportunidade ba Grupu Populasaun Marjinalizadu (ENDIGO) ne’ebé implementa iha Lautem ho Viqueque.

Nia tenik, Viqueque agora preparadu para bele hala’o buat hotu no bainhira kadoras mai, prontu ona hodi hasa’e ekonomia populasaun Viqueque nian.

Iha area turizmu nian, Gregorio hatutan, tenke halo identifikasaun ba fatin sira ne’e bainhira ema bá servisu ne’ebá kuandu presiza iha sábadu no domingu ema bá vizita ne’e mós presiza uma no presiza ema ne’ebé simu bainaka.

“Iha agrikultura pelumenus ita prodús ai-han hira hodi bele responde, ai-fuan munisípiu Viqueque, modo-tahan bele aguenta ka lae? Pelumenus ita prepara restaurante hira iha ne’ebá hodi bele fornese”.

Iha parte agrikultura nian, Viqueque komesa hakiak manu, animál, hodi nune’e bele atende nesesidade mai no hanoin ona halo sasán sira ne’e. Aléinde ne’e, iha edukasaun nian, haruka ema na’in hira bá eskola para mai fali atende servisu sira ne’e, entaun ne’e haree hosi faze pur faze hodi bele atende servisu nasaun nian.

“Buat sira ne’e hotu presiza ema nia abilidade, nune’e bele muda ekonomia populasaun Viqueque nian. Agora daudaun hosi TIMOR GAP nian haruka ona ema Beaço oan  na’in 30-resin bá ona estudu, formasaun no   treinamentu,” informa Administradór Gregorio Hendrique.

Jornalista: Maria Auxiliadora | Editór: Francisco Simões

Imajen: Munisípiu Viqueque tenke prontu atu simu politika Governu da-ualu nian atu dada kadoras mina matan greater sunrise nian mai iha Beaço. Imajen/google