sexta-feira, 24 de maio de 2019

Don Virgílio: Iha Ne’ebé iha Lia Bosok, Sei Laiha Domin


DILI, 23 maiu 2019 (TATOLI) - Bispu Dioseze Dili, Don Virgílio do Carmo da Silva, hateten iha ne’ebé iha lia-bosok, laiha domin.

“Iha ne’ebé mak iha lia-bosok, laiha domin. Loos duni. Ita oras ne’e moris iha sosiedade ida ne’ebé la’ós fásil. Dala barak ita ko’alia kona-ba lia loos uituan de’it,” Bispu hato’o lia-menon ne’e bainhira fó sakramentu krizma ba sarani na’in 563 iha Igreja Maria Auxiliadora, Comoro, Dili, ohin.

Tanba ne’e, Don Virgílio husu sarani sira atu banati Amu Papa nia mensajen ne’e dehan: “mai ita hamutuk promove, hada’et no hanorin inan-aman sira, mai ita hanorin oan sira ho linguajen domin nian”.

 Nia dehan, timoroan sira presiza uza linguajen ne’ebé eduka ho domin, labele trata malu no labele uza lia falsu hodi lasu maluk seluk.

Maski nue’e, Don Virgílio konsiente katak susar tebes atu konserva no prezerva vertude laran-moos nian tanba oras ne’e buat oioin mosu iha mídia.

Jornalista: Evaristo Soares Martins | Editór: Xisto Freitas

Imajen: Bispu Dioseze Dili, Don Virgílio do Carmo da Silva bainhira hato'o liafuan badak ida lansamentu feira loron-matan monu no vizita Timor-Leste 2030 iha Kristu Rei, foin lalais. Foto: Mídia MT

Sem comentários: