sexta-feira, 24 de maio de 2019

Prezidente Autoridade RAEOA Lansa Planu Estratéjiku 2019-2023


Oe-Cusse, 24 maiu (TATOLI) - Prezidente Autoridade Rejiaun Administrativu Espesiál Oe-Cusse Ambeno (RAEOA), Mari Alkatiri, ohin, iha Oe-Cusse, lansa Planu Estratéjiku Rejionál 2019 to’o 2023 ho pájina 200 resin.

Planu estratéjiku Rejionál ne’e formula bazeia ba rezultadu konsultasaun públiku ho komunidade suku 18 ho mós autoridade lokál, juventude no entidade oioin iha Oe-Cusse.

“Ohin aprova no lansa ona planu estratéjiku rejionál 2019 to’o 2023, liuhosi konsultasaun públiku ho autoridade lokál, juventude no entidade oioin,”  hateten Prezidente Autoridade RAEOA, Mari Alkatiri, iha nia diskursu iha ámbitu lansamentu Planu Estratéjiku refere.

Mari Alkatiri afirma, RAEOA tenke sai referénsia ba dezenvolvimentu no Oe-Cusse tenke sai laboratóriu, tenke iha kriatividade, inovativu no deskobre. Maibé, atu atinje ida ne’e, Alkatiri afirma tan, tenke iha korajen atu muda paradigma, kria paradigma foun atu lori deskobre dezenvolvimentu.

Nia lia tun mós, ko’alia dezenvolvimentu presiza ema hotu nia envolvimentu ativa, tanba demokrasia ne’ebé iha mak demokrasia partisipativu la’ós demokrasia reprezentativu.

Iha pilár lima ba Planu Estratéjiku Rejionál Oe-Cusse 2019 to’o 2023 maka dahuluk iha área sosiál, signifika asesu universál ba kualidade edukasaun, asesu universál ba kuidadu saúde ho nia kualidade, oportunidade di’ak ba joven sira, oportunidade di’ak protesaun ba feto klosan sira no adultu.

Daruak maka ekonomia, signifika dezenvolvimentu ba kualidade produsaun ho kompetitivu agríkola; dezenvolvimentu turizmu komunitáriu; dezenvolvimentu indústria lokál sira ne’ebé aposta inovasaun no komérsiu atu aumenta kriasaun empregu ho aumentu ba rendimentu família nian.

Datoluk maka infraestrutura, signifika reabilitasaun ka manutensaun ba liña komunikasaun no ekipamentu sira (Aeroportu, portu, estrada, ponte, telekomunikasaun); asesu universál ba rede públiku eletrisidade; asesu ba água potavél ho kuantidade, kondisaun ne’ebé di’ak liu ba saúde no kustu suportavel tantu atu uza ema produtividade.

Dahaat maka planeamentu urbanu, signifika organizasaun territoriál no urbana sustentável, abilitasaun ba presu asesivel, jestaun rezíduu no protesaun ba biodiversidade.

Dalima maka governasaun no modernizasaun institusionál, signifika estrutura governu ho fleksivel, jestaun finanseiru efisiente no infraestrutura teknolójika ne’ebé adekuadu hodi implementa, aumenta partisipasaun sívika espesialmente ba joven mane sira no feto sira; aumenta envolvimentu ba sosiedade sivíl no xefe suku ho lider komunitáriu iha investimentu iha prosesu planifikasaun no administrasaun.

Enkuantu, informasaun setór sira ne’ebé detallu maka setór sosiál ne’ebé inklui Sekretaria Rejionál Edukasaun, Juventude no Inkluzaun Sosiál no Sekretaria Rejionál Saúde. Setór sosiál nu’udár veíkulu importante atu fornese servisu esensiál ne’ebé permite ba prósperu populasaun nian.

Eziste prioridade xave iha setór sosiál ne’ebé inklui konstrusaun infraestrutura, rekrutamentu pesoál, formasaun, hasa’e númeru matrikulasaun eskolár no rezultadu saúde, dezenvolvimentu setór FTP, dezenvolvimentu ospitál rejionál, protesaun ba membru vulneravel iha komunidade no atu fó empoderamentu ba joven sira mane no feto.

Jornalista: Zezito Silva | Editór: Francisco Simões

Imajen: Prezidente Autoridade RAEOA, Marí Alkatiri. Imajen/Antonio Gonçalves

Sem comentários: