Jenerál Lere klarifika F-FDTL ba buska rezidénsia Angela Freitas

DILI, 04 setembru 2020 (TATOLI) -- Xefe Estadu Maiór Jenerál FALINTIL-Forsa Defeza Timor–Leste (F-FDTL), Majór Jenerál Lere Anan Timur, klairifka katak prezensa membru forsa espesiál F-FDTL iha rezidénsia Angle Freitas nian foin lalais ne’e, atu asegura de’it seguransa hodi próteze lider órgaun soberanu sira husi risku no ameasa.

Lere hatutan, prezensa F-FDTL ne’e mós hanesan sama atensaun ida, tanba Angela Freitas liuhusi nia deklarasaun akuza katak, asaun ne’ebé nia halo envolve mós membru F-FDTL no PNTL nu’udar deklarasaun ne’ebé laloos no la iha faktu.

“Angela ó kuidadu labele dehan katak, F-FDTL no PNTL mós envolve iha demonstrasaun, arte marsiál envolve iha demonstrasaun. Se ó hatún prezidente, nusa mak la iha lei atu próteze órgaun soberania ne’e,” afirma Lere ba jornalista liuhusi konferénsia imprensa, ohin, iha Kuartél Jenerál F-FDTL, Fatuhada, Dili.

Lere deklara nia parte prontu responsabiliza atu hatán iha tribunál kona-ba nia orden hodi halo buska ba rezidénsia Angela Freitas nu’udar portavós grupu Rezisténsia Nasionál Defende Justisa no Konstituisaun RDTL (RNDJK).

“F-FDTL tenke marka prezensa besik Angela nia rezidénsia, hanesan sama atensaun tanba zona ba risku, tanba fatin ne’ebé atu sai fatin ezersísiu “kobra” ba forsa armada. Ha’u la viola diretu umanus, ha’u la kaer ema ida, ha’u la baku ema ida,” dehan Lere.

Nia hatutan, asaun popular ne’ebé RNDJK halo atu hatún Prezidente Repúblika, Francisco Guterres Lú Olo, sai ameasa ba seguransa nasionál, tanba ne’e tuir lei interna seguransa nasionál, F-FDTL bele halo atuasaun hodi ajuda mós servisu PNTL nian.

“Angela mak xefe demonstrasaun hatún Prezidente Repúblika, agora direitu umanus ne’e depois maka ita sei too ba ne’ebá, hodi haree viola ka la viola direitus umanus. Se hatún prezidente, ha’u haruka forsa ba fó alerta ba nia, tanba nia dehan demonstrasaun ne’e forsa defeza no polísia mós iha laran hotu, entaun ida ne’e preokupasaun ba seguransa,” Lere hateten.

Lere hatutan, Angela la’ós foin primeira vés halo asaun demonstrasaun, maibé dezde krize 2006 nia envolve halo Matebian Alfredo Reinado ho nia elementu balun mate, no Moruk Moruk mate mós kauza husi Angela nia hahalok.

Nia dehan, tanba fukun husi problema sira ne’e hotu maka, Komandu F-FDTL halo nia knaar tuir lei atu asegura de’it seguransa iha rai-laran atu labele monu ba krize polítika hanesan iha 2006/2007.

“Krize 2006 sama ona atensaun ba ita, Alfredo Reinado mate, polísia mate, F-FDTL mate, ita nia povu sofre no sai refujiadu no Angela nia hahalok mak Mauk Moruk mate,” Lere tenik tan.

Lere mós lamenta opiniaun públiku barak kritika nia desizaun hodi autoriza forsa halo buska ba Angela nia rezidénsia ho karater terror mentalidade hanesan aktu hamate liberdade espresaun no prosesu demokratizasaun iha rai-laran ne’e laloos. Tanba tuir Lere, membru F-FDTL halo de’it nia knaar atu asegura seguransa.

Lere lia tun tan dehan, Angela kansela nia asaun pasífiku, tanba nia masa maka la iha, no Igreja Katólika, CPD-RDTL, Arte Marsiál sira rasik sira la hola parte iha manifestasaun ne’e.

Jenerál Lere apela mós ba veteranu rezisténsia, jerasaun patriota no organizasaun arte marsiál sira di’ak liu tuur nonook hodi kontribui ba estabilidade seguransa iha railaran.

Jornalista: Eugénio Pereira | Editór: Francisco Simões

Notísia Relevante:

Jenerál Lere sei lori forsakaptura Angela Freitas ho António Aitahan Matak