Hakarak Futebol TL Avansa, Governu Tenki Prepara Fasilidades

Treinador Centro Treinamento Futebol Juvenil Timor-Leste (CTFJTL), Kim Shin Hwan alias Mr. Kim hatete, atu dezenvolvimentu futebol Timor-Leste avansa ba oin hanesan mós rai seluk, maka Governu tenki prepara fasilidades.

Fasilidades sira ne’e mak hanesan kondisaun infraestrutura ba kampu futebol ninian, ekipamentus no seluk tan ne’ebé liga ba dezenvolvimentu futebol nian.

“Iha Timor ne’e fatin ne’ebé diak atu hanorin futebol ne’e rua deit, maske iha labarik barak hakarak tebes aprende tebe bola, ho ne’e infraestrutura futebol nian tenki hadia,”dehan Mr. Kim ba jornalista sira, Kuarta (17/03), iha nia servisu fatin Lecidere, Dili.

Mr. Kim dehan, Timor-Leste iha nia karakteristika temperatura ida manas tebes iha meudia to’o ba lorokraik tuku hat (4), bele fo impaktu ladiak ba saude labarik sira nian bainhira halao pratika bola.

Tanba ne’e iha Timor-Leste ne’e atu hala’o pratika bola somente iha tempu dader san nakukun no lorokraik loron matan monu ona, maibe to’o agora seidauk iha.

“Favor ida halo hanesan ne’e para bele kuida labarik sira nia saude para bele nafatin kontinua pratika ho diak,”Treinador futebol Koreano ne’e hatete.

Tuir nia, ba oin tenki fo edukasaun bola nian ida ne’ebe los ba treinador junior sira atu nune’e bele dezenvolve diak liu tan futebol TL.

Mr. Kim hatutan, Timor nia esperiensia iha kompetisaun ka konkorensia ne’e uitoan liu, labarik sira nia kresimentu ne’e sa’e liu husi kompetisaun bar-barak, seidauk iha kondisaun ida ne’ebe bele fo esperiensia barak ba labarik sira.

Tanba ne’e nia dehan, partisipasaun iha kompetisaun sira importante tebes.

“Ita labele tolera baihira labarik sira nia oportunidade atu hatudu sira nia talentu iha kampu futebol, hetan efeitu ne’ebé la diak tanba ema bo’ot ida nia egoismu no indiferensa, labarik sira sei fo rezultadu ne’ebe diak liu bainhira hetan interese no konsiderasaun husi ema sira,”hateten Treinador Koreano ne’e.

Treinador ne’e hatete, liu husi futebol Timor nia unidade mos bele metin liu tan no hamenus problema hirak ne’ebe iha.

“Ha’u mos prepara didiak hela oinsa atu dezenvolve futebol Timor nian, Governu mos agora tenki dezenvolve maka’as liu tan, Timor oan barak mak agora gosta teb-tebes ho futebol no sira iha talentu especial iha futebol, labarik sira sei iha kompetitividade ida diak liu bainhira ema bo’ot sira iha interese atu hadia diak liu,”Mr.Kim hatete.

Nune’e Mr. Kim mós dehan tan katak, durante tinan 13 ne’e, enfrenta susar, dezafiu no sala barak hodi halo nia dala balun senti triste, dala balun senti kontenti no nia mós hetan valor bo’ot husi buat sira ne’e hotu. Maibe ne’e la to’o nia espetativa tanba nia hakarak atu lori TL ne’e sai diak liu iha mundo.Nev

Jornal Nacional