MARI ALKATIRI: HA’U SERVISU IHA OECUSSE HO PENSAUN VITALISIA

Prezidente Autoridade Zona Especial Económico Social Mercado (ZEESM) Oecusse, Mari Alkatiri, hateten, nia servisu iha rai Oecusse ba ZEESM ne’e manan deit ho salariu pensaun vitalisia.

Dadaun ne’e pensaun vitalisia sai ona preokupasaun públiku, no públiku kontinua ejiji hodi halakon tiha lei pensuan vitalisia. Maibe Sekretariu Jeral (Sekjer) Partidu FRETILIN ne’e manan deit osan husi pensaun vitalisia laos mai fali husi buat seluk.

“Ha’u agora servisu iha Oecusse ho deit pensaun vitalisia la iha tan buat seluk, ne’ebe dehan Pensuan Vitalisia ne’e ha’u mak han tiha, maibe ema la koalia,” afirma, Mari Alkatiri liu husi konferensia ba Imprensa iha salaun, Comite Central Fretilin, Comoro, Tersa (19/05), hodi responde jornalista kona ba preokupasuan públiku nian katak katak Sekjer FRETILIN servisu iha Oecusse ne’e simu salariu husi parte barak.

Alaktiri dehan, FRETILIN komesa iha Governu Alianca Maioria Parlamentar, hatama tiha ona proposta lei ba revizaun pensaun vitalisia.

“Bainhira koalia kona-ba pensaun Vitalisia Timor ha’u nia naran sempre tama. Sosiadade Sivil foti problema maibe orsamentu ba Sosiadade Sivil 14 milloens dolares, ba pensaun vitalisia 3 milloens ne’e se maka simu osan barak liu, orsamentu ba Veteranus bo’ot liu fali orsamentu salariu vensimentu Estadu kuaze 100 milloens,” dehan tan Alkatiri.

Alkatiri la konkorda ema sira ne’ebe maka simu osan pensaun vitalisia tama kategoria reforma, maibe ema ne’ebe maka simu pensaun ne’e tenke iha nafatin obrigasaun hodi servi Estadu.

Tuir sekjer FRETILIN ne’e katak, dala barak ema preokupa lei pensaun vitalisia tanba seidauk asumi kargu hanesan deputadu, maibe kuandu ema sira ne’e asumi fali kargu hanesan deputadu sira nonok ona.

“Enkuantu sira (Sosiadade Sivil-red) seidauk deputadu ejiji, preokupa, hatama fali sira ba deputadu sira nonok kedas, ita koñese malu hela, tanba rai ne’e klot ita koñese malu,”dehan Alkatiri.eby

Jornal Nacional