Fan Feto, AN Tama Prizaun

DILI – Tribunal Distrital Dili (TDD) aplika pena prizaun preventiva ba arguidu Agustinho Nunes, tanba deskonfia komete krime trafiku humanu neebe previstu iha artigu 166 kodigu penal TL.

Liu husi audensia primeira interogatoriu iha loron Sabadu (10/10/2015) Tribunal aplika pena prizaun preventiva ba taxista Agustinho Nunes, tanba halo trafiku humanu hasoru vitima A no B, ho idade 15 bainhira atu ba faan iha otel Audian hetan kapturasaun husi Polisia Nasional Timor Leste iha loron (6/10/2015) loraik.

Antes nee tuir Komandante Servisu Investigasaun Kriminal (SIK), Ludgerio Lay katak iha loron Tersa loraik SIK simu informasaun husi komunidade sira katak iha taxi ida neebe mak halao hela transaksaun ba labarik minoridade nain rua, hodi lori ba atu faan iha ema iha Hotel ida iha Audian. Rona ida nee Komandante SIK fo kedan ordem ba nia membru sira hodi ba too fatin refere, too iha neeba hare suspeitu nee lori duni labarik nain rua nee ba Hotel Audian. Ho ida nee membru sira halo kedan atusaun hodi asegura kedan labarik ho suspeitu nee lori kedas mai iha PNTL.

Ita prosesa hotu kedan iha kalan nee, no ohin (Kuarta) hatoo ona ba iha Ministeriu Publiku. Suspetu mak sei hatama iha sela PNTL nian hodi hein desizaun husi MP tun mai, tamba sira maka iha kompetensia tomak atu hare ba problema nee,” informa nia.

Audensia nee preside husi juis Estagiario Ersilia de Jesus, reprejenta ministeriu publiku prokuradora Remizia de Fatima. No arguidu hetan assistensia legal husi defensor publiku Fernando Carvalho Lopes no Estaque Sakramento. Informasaun kompletu iha STL jornal no STL Web, edisaun Tersa (13/10/2015). Domingas Gomes

Suara Timor Lorosae