SUJERE KRIA LEI FOUN, HALAKON LEI PENSAUN VITALISIA

Organização Não Governamental (ONG) Lalenok Ba Ema Hotu (LABEH) sujere, lei pensaun vitalisia aktual presiza halakon, maibe kria hikas fali lei foun ida katak pensaun vitalisia ne’e fo deit ba fundadores nasaun.

“LABEH husu ba Parlamentu Nasional atu halakon Lei Pensaun Vitalisia, maibe halo lei foun ida ne’ebe bele fo Pensaun Vitalisia deit ba fundador nasaun sira ne’ebé funda ita nia nasaun, sira ne’ebé aprova ita nia Konstituisaun, fo valorizasaun ba sira liu husi pensaun vitalisia ba deit Primeiru Prezidente da Republika, Primeiru Prezidente Tribunal do Rekursu, Primeriru Membru Parlamentu iha Primeiru Lejislativu no Membru Primeiru Governu Konstitusional, tamba sira ne’e mak hari’i nasaun hosi zero,”afirma diretor ezekutivu LABEH, Christopher Henry Samson, Segunda (12/10) horseik.

Entretantu ba membru Governu no membru Parlamentu Nasional (PN) tuir LABEH hasai tiha pensaun vitalisia fo deit subsidiu ba sira hodi hatutan vida moris.

“Governu bele fo subsidiu tinan ida ka tinan rua deit ba membru governu no membru parlamentu sira ne’ebé partisipa ona iha dezenvolvimentu nasional, maka ida ne’e deit, maibe la bele liu husi ida ne’e, ida ne’e maka LABEH nia pozisaun desde uluk kedas to’o agora,“dehan Chirstopher.

Tanba kompara professor ida iha tempu portugues no tempu Indonesia nian no tempu ukun rasik an nian, hatudu profesores sira ne’e produs ona matenek barak, mas to’o ohin loron balun sei servisu nafatin, maibe sira la hetan pensaun vitalisia laiha ema ida mak rekoñese sira, e sira mos la iha garantia ba sira nia vida.

Nune’e moz nia parte kompara mos infermeiru sira ne’ebe servisu hodi salva povu nia vida husi tempu portugues no tempu Indonesia ho tempu ukun rasik an, infermeiru sira ne’e mos salva vida lubun bo’ot ida to’o ohin loron e balun sei servisu nafatin, maibe sira la hetan pensaun vitalisia ruma, e nein ema rekoñese tan sira ninia kontribuisaun ba povu ho nasaun.

“LABEH sente ida ne’e injustisa bo’ot ida tanba ne’e LABEH mantein ho posisaun ida katak halakon pensaun vitalisia, halo lei foun ida ne’ebe valoriza deit fundador nasaun, sira ne’ebe harii nasaun husi zero, membru orgaun soberano sira ne’ebe uluk primeira vez kaer ita nia nasaun ida ne’e mak bele valoriza sira liu husi pensaun, maibe sira seluk bele hetan subsidiu ruma tinan ida ka tinan rua no la bele liu tinan lima.

Tantu antes ne’e kedas wainhira implementasaun lei pensaun vitalisia ne’e LABEH kontra e konsidera pensaun vitalisia nudar korupsaun legal, ne’ebe Estado halo ba nia povo rasik.

Entretantu ONG Naun Govermental LABEH fo ninia apoiu tomak ba Movimentu Universitariu Timor Leste ne’ebe halo asaun pasifika hodi ejije ba Parlamentu Nasional atu halo revizaun ba lei pensaun vitalisia ne’e ou halakon.

“LABEH nu’udar NGO Anti-Korupsaun ne’ebe tane a’as valor transparansia, akuntablidade no kombate korrupsaun; agradese ba inisiativu estudante sira nian ne’ebe hahu ona halo asaun pasifiku ida hodi husu Parlamento Nasional atu halo mudansa ba Lei Pensaun Vitalisia.

Nune’e mos iha parte seluk diretur ezekutivu Luta Hamutuk, Mericio Akara, deklara ONG Luta Hamutuk (LH) sedauk desidi sei involve iha asaun manifestaun MUTL ne’e ou lae, maibe LH suporta atyu halo revizaun ba lei pensaun vitalisia ne’e.

“Atu ejije para iha revisaun ba lei pensaun vitalisia ne ema maioria mak si suporta, inklui Luta Hamutuk,”haklaken Akara.

Tanba tuir nia, asaun ne’ebe mak MUTL halo ne’e LH fo apoiu atu ba futuru bele poupa osan Estado, inklui hodi labele halo ema sai baruk ten ne’ebe tur deit simu osan.

MUTL kontinua amesa PN.

Entretantu iha fatin ketak, portavos Movimentu Universitariu Timor-Leste (MUTL), Faustino Soares deklara katak, MUTL iha tempu badak nia laran sei kontinua halo tan manifestaun ho eskala bo’ot hasoru Parlamentu Nasional.

MUTL tempu badak nia laran sei organiza manifestasaun ne’ebe ho volume bot hasoru PN, tanba durante manifestaun iha fulan Setembru-Outobru durante loron 6 nia laran parlamentu nasional ladauk fo resposta ba ejijensia MUTL hodi halo revizaun ba lei pensaun vitalisia.

Tuir planu MUTL manifestaun sei involve povo bai-bain, sosiedade sivil, religioza, organijasaun rejistensia balun ne’ebe mak durante ne’e preokupa ba lei pensaun vitalisia ne’e.

“Tempu too ona atu ami tama ba iha faze mobilijasaun popular atu nune’e bele sai unifika forsa ema hotu-hotu inklui mos atu uniformalija luta entidades hotu nian ba lei refere,”akresenta portavos MUTL, Faustino Soares. Ola/bal

Jornal Nacional