PR timoroan demiti xefe Forsa Defeza nian no nomeia komandante foun

Prezidente Repúblika timoroan demiti ona, iha loron-tersa ne'e, xefe Estadu-Maior hosi Forsa Defeza Timor-Leste (F-FDTL), majór-jenerál Lere Anan Timur, promove nune'e nia susesór maka brigadeiru-jenerál Filomeno da Paixão de Jesus, ne'ebé promovidu ba Major-Jenerál.

Iha komunikadu ne'ebé fó sai iha inísiu kalan (oras lokál), Taur Matan Ruak esplika katak hili "susesaun iha F-FDTL, hodi fó kontinuidade ba prosesu ne'ebé hahú iha 2011 ho susesaun ne'ebé akontese ba nia iha lideransa F-FDTL nian".

Xefe Estadu hatutan katak kumpri ona asaun ne'ebé hakerek iha konstituisaun, ne'ebé fó kbiit ba nia hodi nomeia no demiti, ho proposta hosi Governu, xefe Estadu-Maior hosi Forsa sira Defeza Timor-Leste nian.

Maibé, iha kazu ne'e Taur Matan Ruak la tuir proposta hosi Governu ne'ebé iha reuniaun hosi Konsellu Ministru sira nian iha loron 12 Outubru tinan liubá defende ona renovasaun hosi mandatu Lere Anan Timur nian no, nune'e, nia kontinuidade iha forsa defeza nian.

Taur Matan Ruak argumenta ona katak "hafoin luta armada tinan 24 nia laran, konsolidasaun hosi dezenvolvimentu institusionál hosi Forsa Armada sira nian determina tranzisaun iha lideransa superiór F-FDTL nian hanesan prosesu naturál ida, halo ho dalan progresivu hodi preprara jerasaun foun sira hosi ofisiál sira ba komando Forsa nian".

Prosesu ne'e hodi mantén mós "espetativu lejítimu sira nakloke ba progresaun iha kareira hosi ofisiál sira F-FDTL nian, hodi afirma fali konfiansa hosi poder polítiku iha kapasidade lideransa hosi xefe sira F-FDTL nian".

Lere Anan Timur hanesan "promovidu ba postu honorífiku hosi tenente-jenerál, tanba kumpri ona mandatu kompletu hosi fatin ne'ebé nia hetan nomeasaun".

"Prezidente Repúblika, ho naran pesoal no Timor-Leste nian, agradese ba majór-jenerál Lere Anan Timur ba tinan sira vontade serbisu ba nasaun, ho kontribuisaun ba luta libertasaun nasionál nian, promove valór sira fidelidade nian, lealdade no obediénsia tomak entre Forsa sira, no lideransa hosi F-FDTL ne'ebé permiti ona kontinuasaun hosi prosesu dezenvolvimentu Forsa Armada sira nian", refere hosi komunikadu.

Ba nia susesór, Filomeno Paixão, xefe Estadu hatudu "konfiansa tomak iha nia lideransa hosi prosesu ne'ebé hala'o daudaun iha dezenvolvimentu no konsolidasaun hosi Forsa Armada ida metin no disiplinadu ba serbisu ema tomak nian".

Lere Anan Timur simu pose ba knaar ne'e iha loron 06 Outubru 2011 hosi Prezidente Repúblika, iha tempu ne'ebá, José Ramos-Horta, hodi troka Taur Matan Ruak, ne'ebé hakarak fila ba moris sivil hafoin aprezentasaun ofisiál ba nia rezignasaun.

Taur Matan Ruak, ne'ebé sai ona hanesan komandante ikus hosi rezisténsia timoroan nian, Falintil, hafoin ne'e eleitu nu'udar prezidente.

Iha 2011, no aleinde Lere Anan Timur no Filomeno de Jesus, promove mós koronél Falur Rate Laek, nomeadu Xefe Estadu-Maior hosi Forsa Armada sira nian.

Filomeno da Paixão de Jesus, moris iha 1953, tama iha Falintil iha loron fundasaun nian, iha 1975, no ho restaurasaun independénsia nian halo parte nafatin iha Forsa Defeza.

Kondekora hosi Prezidente Repúblika tanba serbisu sira ne'ebé fó iha Operasaun Halibur, Filomeno da Paixão de Jesus promovidu ona ba koronél iha loron 14 Janeiru 2009, no antes kompleta ona Kursu ba Promosaun ba Ofisiál Jenerál sira nian.

SAPO TL ho Lusa