Berek Sosa Demokrasia ho Mate

Eroi barak sosa independénsia ho raan no mate. Eroi balun mate ba hamlaha. Eroi seluk mate iha inimigu nia liman laran. Iha ambiente ukun rasik-án, eroi “La-Sama” sosa mate ho fo-án tomak ba serbisu hodi hadi’a povu nia moris. Maibé, iha Partidu Demokrátiku nia konsolidasaun iha terenu, eroi “Berek” sosa demokrasia ho mate.

 Iha kalohan tada udan atu monu rai. Iha ahi suar tada iha ahi matan. Sentimente triste hafalun iha família boot no mós kompañeiru tomak Partidu Demokrátiku (PD) nian. Basá, iha loron Domingu (31/01/2016) oras tuku tolu (3:00) madrugada sira tenki husik hela sira nia belun, aman, maun no kolegas matebian Lucas “Berek” Vidigal (40), hosi Munisípiu Liquiça ne’ebé fila hikas ba aman Maromak nia kadunan santu.

Lucas nia mate hanesan mistériu dolorozu ida ne’ebé xoke tebes família, kolegas no mós kompañeiru sira. Matebian sai hosi kapital Díli iha tuku 10:00 dadersan ho kondisaun di’ak hela ho objetivu atu ba hala’o atividade konsolidasaun partidu nian iha Aldeia Ailembata, Suku Babulu, Postu Administrativu Uatulari, Munisípiu Viqueque.

Bainhira to’o iha fatin ne’ebá, iha oras tuku 10:00 kalan. Iha biban ne’ebá antes toba iha tuku 02: 00 madrugada matebian hamutuk ho ninia kompañeiru sira sei han hamutuk na’an fahi. Hafoin kabun mamuk kalsu netik ho ho naan-fahi, nia ba deskansa (Toba) iha kareta Prado rental ho númeru matríkula 20.797 Tls nia laran. Iha kareta laran akontesse nia muta maka’as to’o hakotu iis iha tuku 03:00 dadersan madrugada.

Matebian Lucas Berek iha partidu pozisaun hanesan Xefi Departementu Lojístika Nasionál PD nian no mós hanesan dosente iha Universidade da Paz (UNPAZ). Tuir médiku [doutór] hosi Postu Uatulari, Abito Soares Menezes, hatete Lucas mate tanba motivu menus oksijen tanba tensaun ne’ebé maka’as no toba iha kareeta laran taka vidru metin ne’ebé la iha espasu ba anin tama ba laran.

Dalaruma, tuir médiku ne’e, matebian ne’e mós iha moras anterior ruma ne’ebé maka provoka tan presaun psikolójiku. Relasiona ho akontesementu ne’e, Polísia Eskuadra Uatulari mós to’o kedas iha fatin akontesementu hodi halo investigasaun ba motivu hosi Lucas nia mate. Maibé too agora ladauk fó sai rezultadu tanba sei iha prosesu investigasaun. Hosi akontesimentu ne’e, mate isin lori kedas mai iha Díli hodi entrega ba iha família para halo serimónia funeral.

Vise Prezidente PD Nominando “Buras” Martins sente triste ho akontessimetu ne’e tanba lakon kompaiñeiru di’ak ida.  “Ekipa ne’ebé maka mai iha Postu Uatulari hetan asidenti, ami lakon ami nia kompaiñeiru, kolega, maun, alin di’ak ida iha fatin ne’e. Maromak horikalan bolu hikas nia fila ba aman Maromak nia kadunan santu,” dehan Nominando iha fatin akontessimentu.

Nia haktuir mós katak, hanesan militantes partidu nian ne’ebé mate iha misaun nia laran, tanba tuir kalendáriu PD nian iha loron 30-31 tenki halo atividade konsolidasaun partidu nian iha Munisípiu Viqueque ne’ebé maka hala’o ho Postu Administrativu hotu.

Nia dehan, kona-ba responsabilidade klaru katak iha partidu ninian, tanba matebian mós tur iha estrutura partidu hanesan Xefi Departementu Lojístika Nasionál ne’ebé signifika katak, atividade hotu-hotu PD nian la ses hosi nia.

“Koalia kona-ba responsabilidade, klaru ke PD tenki responsabiliza, trata tuir bai-bain Partidu Demokrátiku trata ba nia membru estrutura no militantes sira, tanba matebian mós husik hela ninia família liu-liu nia oan nain hitu (7), nia fó nia vida tomak hodi sosa demokrasia, sosa Partidu Demokrátiku iha rai ida ne’e,” Buras esklarese.

Matebian Lucas “Berek” nia mate hanesan membru no estrutura ba PD nian ne’ebé hakat tuir ninia kompañeiru fundadór no Prezidenti PD, Fernando La-Sama de Araújo, nia ain-fatin. La-Sama mate iha terenu tanba dedika-án serbisu ba povu nai diak, Berek mate sosa demokrasia hodi haburas PD buras ba nafatin. Mate nu’udar moris ida nia rohan. Maibé, mate la’os luta ida nia rohan. Adeus Berek! (Júlia)

Matadalan