Governu timoroan aprova sosa asaun sira hosi Oi iha Timor Telecom

Governu timoroan aprova ona, iha loron-kuarta ne'e, hafoin debate naruk, hodi sosa partisipasaun hosi Oi iha empreza telekomunikasaun boot iha Timor-Leste, Timor Telecom, konfirma ona hosi fonte ezekutivu ba Lusa.

Asuntu debate iha loron-kuarta ne'e iha parte ikus hosi reuniaun estraordináriu naruk ida hosi Konsellu Ministru sira nian, ne'ebé hahú iha tuku 09:00 dadeer (oras lokál) no to'o tuku 20:00 (oras lokál), haktuir hosi fonte hanesan.

"Aprova tiha ona hodi sosa partisipasaun", hatete hosi fonte maibé la adianta pormenór sira.

Ezekutivu agora sei nomeia komisaun ida ne'ebé sei halo negósiu ba folin operasaun ho konsórsiu autorizadu hosi Oi hodi alinea nia partisipasaun iha Timor Telecom (TT).

Iha kauza maka iha parte boot hosi kapitál TT (54,01%), kontrola hosi sosiedade Telecomunicações Públicas de Timor (TPT) ne'ebé Oi kontrola 76% hosi nia kapitál, no tau hamutuk ho partisipasaun ida diretu hosi PT Participações SGPS ho 3,05%.

Asionista hosi TPT sira seluk maka Fundasaun Harii - Sosiedade ba Dezenvolvimentu Timor-Leste nian (iha ligasaun ba dioseze Baucau nian), ne'ebé kontrola 18% no Fundasaun Oriente (6%).

Iha TT, kapitál fahe entre TPT (54,01%), Estadu timoroan (20,59%), empreza ho sede iha Makau VDT Operator Holdings (17,86%) no emprezáriu timoroan Júlio Alfaro (4,49%).

Iha tinan 2015 nia rohan, PT Participações hanoin katak folin totál hosi TT besik iha dolár millaun 150 no nia partisipasaun indiretu (41,12%) no diretu (3,05%) sei to'o besik dolár millaun 66,26.

Folin ajustadu, hodi hanoin katak tusan líkidu dolár millaun 59,47, ne'ebé tau hamutuk ho empréstimu ida ho PT Finance besik dolár millaun 24,68.

Asuntu ne'e debate nafatin hosi Governu timoroan iha fulan barak nia laran, ajenda tiha ona ba debate dalabarak iha Konsellu Ministru sira nian maibé desizaun ida ne'ebé adia beibeik tanba diferensa hosi opiniaun hosi Ministériu rua, Ministériu Obra Públika, Transporte ho Telekomunikasaun (ne'ebé favorável) no Ministériu Finansa (ne'ebé kontra operasaun ne'e).

Setór balun hosi Governu hakarak sosa totalidade hosi asaun sira Oi nian, disolve nune'e parte sira hodi kontrola de'it 51% hosi kapitál total TT nian.

SAPO TL ho Lusa