Merenda Eskolar Iha Munisipiu Viqueque La La’o, Emilio: Prosesu Aprendizajen Kontinua La’o

Diretor Edukasaun munisipiu Viqueque, Emilio Amaral, hateten maske programa merenda eskolar desde tama tinan foun (2016) to’o agora seidauk la’o, maibe sei la fo impaktu ba iha prosesu aprendizajen, tanba estudantes sira tama klase hanesan baibain.

Nia dehan, merenda eskolar iha munisipio Viqueque la la’o durante fulan hat nia laran, maibe estudantes sira nafatin tuir prosesu aprendizajen. 

“La fo impaktu maske merenda laiha, sira nafatin mai eskola tuir prosesu aprendizajen,” Diretor Amaral hateten via telephone. 

Nia esplika, objetivu implementa merenda eskolar ne’e atu fo han estudantes, liu –liu sira ne’ebe hela do’ok husi eskola tanba maioria la matabixu husi uma. 

Nia informa, merenda eskolar seidauk hahu fali tanba orsamentu atu sosa modo seidauk sai no espera katak iha fulan Marsu bele hahu fali ona.

Iha parte seluk Vise Ministru Edukasaun, Abel da Costa Ximenes, hateten iha nasional merenda eskolar hahu fila fali ona, maibe iha munisipio balun mak seidauk sei iha prosesu. 

“Osan ami asina tiha ona e eskola balun komesa simu osan no hahu funsiona fila fali, maibe balun mos seidauk,” Vise Ministru Ximenes informa. 

Nia hatutan, munisipio sira seidauk tanba problema udan no kondisaun infra-estruturas ne’ebe la favorese atu distribui fo’os no sasan sira seluk ba implementasaun. 

Estudantes Ensino Baziku Fatu-Hada, Nivio Baptista, hateten merenda eskolar iha sira nia eskola seidauk funsiona fila fali. 

“Ami nia eskola seidauk han, maibe ami lori osan hodi sosa hahan besik escola mak han,”  nia hateten.

The Dili Weekly