EMA NAIN 31 INVOLVE SUNU MANUEL TOO MUTUK

DILI - Arguidu hamutuk tolu nulu resin ida (31) ameasadu kadeia, tanba sunu Manuel to’o mutuk. Kazu ne’e suku Lasaun, postu administrativu Atsabe, munisípiu Ermera.

Loloos ne’e kazu ne’e la’os problema bo’ot, maibé tan de’it problema  la-hun la-dikin,  arguidu na’in 31 kombina malu hodi ba halo torturasaun  ba lezada.

Tuir tradisaun lisan, arguidu na’in 31 ho lezada sei família hela, tanba sira hela suku ida, maibé aldeia  diferente.

Iha primeiru interogatóriu antes ne’e, arguidu na’in 8 hetan prizaun preventiva no arguidu na’in 21 hetan  Termu Identidade Rezidensia (TIR).

Oras ne’e, prosesu audénsia julgamentu hala’o hodi rona produsaun provas mai hosi parte arguidu ho lezada.

Tuir akuzasaun hosi Ministériu Públiku, katak loron 02/11/2014, iha Suku Lasaun, aldeia Nunmea ho aldeia Ai abe, postu administrativu Atsabe, munisípiu Ermera. Iha momentu ne’ebá, ema hotu preokupa lori ai-funan ba rate.

Iha altura ne’e mós mosu konfrontasaun entre lezadu Rogerio  sei família ho vítima Manuel, nune’e Lezadu Rogerio  hakilar ba nia fen Pascoela dehan, “motor atu soke o ne’e”.

Tan ne’e, Gilberto ne’ebé lori motor nu’udar mós arguidu hatán, nia liu, soke mate mós di’ak hela.

Nune’e arguidu Gilberto ba husu, ‘ita jagoan ka’. Bainhira rona Arguidu Gilberto nia lian, Lezada Rogerio halai, tanba tauk.

Depois Lezadu Rogerio halai mosu vítima Manuel,  nu’udar família hosi lezada Rogerio, nune’e arguidu sira kaer vítima baku to’o  monu ba rai, hodi rejulta lezado dezmaia, no arguidu sira sona kanek tan lezadu.

Bainhira vítima desmaia hela, arguidu sira kaer vítima manuel baku no soe tama tiha ba uma laran,  ikus arguidu sira sunu mutuk tiha lezadu ho uma hotu.

Iha altura ne’ebá mós, molok lezadu hakotu iis, vítima hakilar dehan “ha’u mate ona, ha’u mate ona”, maibé laiha ema ida mak ajuda.

Ho hahalok ne’e, arguidu na’in hirak ne’e, Ministériu Públiku akuza arguidu sira ho krimi haat hanesan planeadu krime homesidu, krime dano com violénsia, krime furto agravado, no krime ofensas simples.

Arguidu sira sunu mutuk vítima Manuel ho uma lisan ida hamutuk ho sasan lulik ne’ebé tau iha uma lulik refere inklui uma komunidade ida ho motor ida.

Pior liu tan arguidu sira na’ok duni vítima nia osan rihun $10 ne’ebé tau iha kareta laran.

Hafoin rona akuzasaun, tribunál haree arguidu sira barak tebes, nune’e sira maoria laiha advogadu no defensor públiku hodi fó asisténsia legál ba sira.

 Nune’e tribunál fó opurtunidade ba parte arguidu sira hodi konsluta ho defensór públiku ho advogadu privadu ruma, nune’e hodi fó asisténsia legál ba sira nia kazu, entaun tribunál adia kazu ne’e ba tempu seluk.

Prosesu julgamentu rona provas entre vítima ho suspeitu ne’e, prezide hosi Juiz koletivu Zumiaty Freitas, Antoninho Helder,  no Albertina da Conçeicão Neves.

Purtantu,  arguidu sira hetan defeza  hosi Defensór Públiku Rogerio Viegas ho Sebastião Amado, maibé tanba arguidu sira barak, presiza arguidu sira buka tan defeza.(max)

Timor Post