TAUR: LABELE POLITIZA FORSA ARMADAS

BOBONARO - “Ha’u la’ós  polítiku para polítik sira halimar, forsa armadas ita labele polítiza, ita nia argumentu ne’e tenke  fó sai labele subar balun, subar balun ne’e ladun di’ak,” Prezidente Repúblika, Taur Matan Ruak.

Xefe Estadu afirma diskusaun ba kazu ezonerasaun ne’e mak laiha ona solusaun nia sei foti desizaun tanba kazu ezonerasaun ne’e labele dada naruk tan.

Polémika ba desizaun Prezidente Repúblika ba ezonerasaun Xefe Estadu Maior Jenerál F-FDTL, Maijor Jenerál Lere Anan Timur hodi promove ba Tenente Jeneral, no promosaun ba Brigadeiru Jeneral Filomeno Paixão ba Maijor Jeneral hodi lidera F-FDTL, seidauk to’o nia rohan.

Hafoin Tribunal Rekursu rejeita rekursu kontesiozu hosi governu, Prezidente Repúblika ho governu kontinua halo diálogu.

“Prezidente tenke  ko’alia nafatin mas Prezidente labele dada buat ne’e to’o iha ne’ebé de’it, to’o momentu ida laiha ona solusaun Prezidente tenke  deside, ne’e hanesan ne’e iha nasaun hotu-hotu,” Taur hatete ba jornalista sira bainhira ba hala’o diálogu ho komunidade sira iha Postu Administrativu Bobonaro, Munisípiu  Bobonaro, Domingu, (03/04), hafoin vizita suku 12 iha munisípiu Likisa.

Maske nune’e, xefe estadu dadauk ne’e kontinua rona governu para haré  solusaun saida mak hetan, maibé  xefe estadu nia pozisaun mak kontinua nafatin buka solusaun mas solusaun ida rasional.

“Labele ita nia hakarak mas tanba saida mak hakarak ida ne’e, tanba saida mak ita tenke  halo ida ne’e, laiha esplikasaun ne’e labele,” Taur subliña.

Xefe estadu hatete, ema seluk mak bele aseita defende buat ne’ebé  laiha fundamentu karik mas xefe estadu ladun aseita tanba xefe estadu la toman ho ida ne’e, Taur Matan Ruak gosta hatoman ho buat ne’ebé fundamentu, hatete  dehan lakoi, lakoi tanba saida, hatete  dehan hakarak, hakarak tanba saida? Nune’e para hanoin ema nian bele funsiona, nia ulun fatuk ne’e la’o, sela’e ita nia ulun la la’o.

Xefe estadu esplika PR defende ezonerasaun Jenerál Lere Lere Anan mas governu hakarak kontinua, ne’e normál, tanba ne’e governu tenke  esplika tanba saida mak governu hakarak Maijor Jenerál, Lere Anan Timur kontinua.

Rajaiun sira ne’ebé mak governu defende tanba kestaun siguransa, maske nune’e xefe estadu hatete  kestaun konfiansa ne’e importante. Bainhira Taur Matan Ruak sei iha Jenerál, eis Prezidente Ramos Horta bolu nia ho eis Komandante Jeral Polísia Nasionál Timor-Leste (PNTL), Komisariu, Longhuinos Monteiro hodi husu kona-ba estabilidade nasionál bainhira Organizasaun Nasoens Unidas (ONU) sai hosi Timor-Leste, maibé  Taur Matan Ruak hanesan Jenerál hatete  katak uluk hasoru nasaun bele nusa mak hasoru bandidu ida labele, tanba ne’e kestaun konfiansa ne’e importante.

Governu hatete  dehan prepara tranzisaun, tanba ne’e xefe estadu hatete  nia rasik uluk prepara tinan 10 la to’o, hirak ne’ebé prepara tinan 2 de’it ne’e to’o fali, inklui mós tenke  prepara ofisiál sira.

Tanba ne’e xefe estadu hatete  úniku timoroan ne’ebé hasai kursu Jenerál ne’e mak Brigadeiru Jenerál, Filomeno Paixão no hasai mós lisensiatura iha area direitu nian.

“Úniku timoroan hasai kursu jenerál mak Filomeno Paixão hasai iha Portugal ho mais de 16 valores, segundu nia hasai lisensiatura em direitu, ha’u laiha lisensiatura nein um poco Jenerál kompara ha’u ho sinor Meno imposivel, ne’e signifika ita la rekoinese abilidade espirensia, sabedoria, no sientifiku tanba nia estuda,”xefe estadu hatete.

Tanba ne’e xefe estadu hatete, governu labele konsidera Prezidenete hanesan adversáriu maibé  hanesan parseiru, ejemplu ne’ebé xefe estadu hato’o bei-beik ba sidadaun sira katak uma karik orgaun do estadu sira ne’e hanesan ai rin mas Prezidente da Repúblika simbólu nasaun, komandante supremu das forsas armadas, naturalmente iha pozisaun ida ke forte, pozisaun labele falsu, pozisaun ida ke rasionál, lozika ita bele sustenta.(dgx)

Timor Post