ABORTUS KONTRA UKUN FUAN MAROMAK

Igreja Katolika kontra maka’as asaun  juventude  feto balun  ne’ebe maka sempre halo abortus ba labarik  iha sira ninia kanotak, tanba aksaun ne’e kontra ukun fuan maromak nian.

Kestaun  ne’e hato’o husi Padre (Pe) Parokia Aimutin, Manuel Lelo Talo, ba jornalista iha Rezidensia Bispu Dioseze Lecidere  Dili,  Segunda (25/07), relasiona ho  kazu inan feton balun  ne’ebe sempre soe bebé iha  valeta nomos iha fatin seluk  tan   ne’ebe sempre akontese, liu-liu   iha kapital  Dili laran.

Pe. Manuel  Lelo  Talo afirma, abortus katak,  aksaun ida ne’ebé hakarak halakon labarik ne’ebe  iha inan  nia kanotak no aksaun abortus ida  ne’e  Igreja kontra nomos umanidade kontra tan.

“Asaun ida ne’e ukun fuan Maromak nian ba dala 5 kona-ba keta oho,  liu-liu tan labarik sira   hetan abortus   ne’e  primeiru sira la  iha sala. Tanbasa ema la iha sala  ita oho,  ema la sala maka ita oho ne’e berarti ita ne’e  penjahat,depois labarik labele depende  ninia a’an, se ema bo’ot  karik nia bele defende ninia a’an, maibe labarik ne’ebe kiik iha kabun laran tan, se imi hatama aimoruk a’at nia hein para mate, entaun Igreja haree nu’udar sala ida ne’ebe maka bo’ot tebes,”dehan  Manuel Lelo Talo.

Pe. Manuel Lelo Talo, tuir lei kanoniku nian (lei kreda nian) se planu, se maka halo, se maka apoia kona-ba abortus ne’e, sira hotu iha grupu ne’e bele hetan  kastigu.

“Ne’e katak, kuandu sira sussesu hala’o ona aborsi (abortus) ne’e automatikamente sira sai ona  husi Igreja, sira la membru Igreja ona, kuandu sira tama fali presiza sira hakribi sira nia sala iha Igreja ba Amu Lulik sira atu nune’e sira bele kasu sira nian sala atu nune’e sira bele tama fali nudar membru Igreja,”dehan Pe. Manuel Lelo Talo.

Pe. Manuel Lelo Telo dehan, abortus ne’e akontese tanba iha relasaun oi-oin, hanesan karik  mediku sira  desidi diak  liu  abortus tiha labarik ne’e, se lae labele salva labarik nia inan. No ne’e iha lojika.

“Ida  ne’e  ita bele simu. maibe seluk hanesan ekonomikamente  feto  ne’e laiha kapasidade  tau  matan ba nia oan kuandu labarik moris ou sosialmente ami moe, tanba ami nia oan feto sei kiik hela kous ona,  ne’e  Kreda la simu  ida ne’e,” dehan Pe. Manuel Lelo Telo.

Atu prevene asaun abortus ne’e,   Pe. Manuel Lelo Telo, husu ba joven sira atu fokus ba sira nian eskola atu  nune’e bele perepara diak sira nian futuru,    depois maka bele forma uma kain.

“Sarani  ne’ebe  diak nune’e tau matan diak  liu tan ba  imi nia a’an rasik,  depois ikus fali imi  hetan oan bele tau matan mos ba oan sira ne’e nudar oan  sarani diak,”dehan Pe. Manuel Lelo Telo.avi

Jornal Nacional