Xina duun Koreia Sul maka “prejudika”konfiansa mútua

Xina fó kulpa ba Koreia Sul maka prejudika “konfiansa parte rua” hodi konkorda atu harii sistema antimisil norte-amerikanu nian ba iha península koreana, maski Pekin lahatan, tuir ajénsia Yonhap fó sai.

Seul ho Washington iha fulan ne’e fó sai kona-ba desizaun atu harii sistema THAAD, hafoin teste nukleár foun ho misil balístika, hosi Koreia Norte.

Planu hodi harii sistema ne’ebé forte, hodi lansa projetu ida ne’ebé bele harahun misil inimgu nian, hamosu krítika maka’as hosi Pekin no Moskovu, tanba sira konsidera ida ne’e sei hamaetin kapasidade militár EUA nian iha rejiaun refere.

"Koreia Sul ninia hahalok foun ne’ebé prejudika ami-ninia konfiansa ba malu”, dehan ministru Negósiu Estranjeiru Xina ba imprensa, hafoin hasoru malu ho ninia konjénere sul-koreanu, durante forum rejionál iha Vientiane, Laos.

"Ha’u hakarak hatene asaun prátika ne’ebé Koreia Sul sei foti hodi proteje ami-ninia relasionamentu forte", dehan Wang, no sita hosi ajénsia Yonhap.

Xina hanesan merkadu esportasaun prinsipál sul-koreana nian nomós parseiru importante ba esforsu Seul hodi hatama programa nukleár hosi Koreia Norte nian.

Durante enkontru, ministru Negósiu Estranjeiru Koreia Sul, Yun Byung-Se, rekoñese kona-ba dezafiu iha relasaun bilaterál, maibé dehan katak harii THAAD somente defende de’it, maibé sei lafó perigu ba seguransa Xina, tuir Yonhap fó sai.

SAPO TL ho Lusa