Labele Rende Uluk Bainhira Seidauk Kompete

DILI (ANTIL) - Labele rende uluk bainhira seidauk kompete. Ida ne’e maka atleta Juventina Napoleão de Jesus (26) nia prinsípiu.

Maske kondisaun lá afavór ba ninia luta maibé nia nia esforsa án to´o hetan segundu lugár iha eventu Toraja Internasionál Marathon ne’ebé hala’o iha Toraja, Sulawesi do Sul, Indonézia, 13-14 Agustu 2016.

Nia segundu lugár iha kompetisaun halai taru ho distánsia 23 kilómetru. “Ha’u senti kontenti teb-tebes tanba durante treinu ne’e iha rezultadu duni,” Juventina dehan ba ANTIL iha edifísiu Federasaun Atletizmu, Jináziu Dili, foin lalais ne´e.

Nia haktuir nia hetan difikuldade duni tanba sira halai tuir foho maka barak liu duké tetuk ho tún. “Nu’udar atleta tenki esforsu án para bele manán iha kompetisaun,” atleta ne’e hateten ho hamnasa.

Durante ne’e sira treinu iha rai tetuk de’it. Tanba ne’e, nia sujere atu ba oin bele treinu mós iha rai lolon para bele hanaruk iis no hasa’e fíziku. Iha segundu lugár ne’e, nia hetan medalla silver 1 ho osan US$7000.

Sai vensedor iha numeru halao 23 kilometru mak Isabellah Kigen hosi Indonesia ho durasaun tempu (race time) 01:28:05, tuir kedan Juventina Napoleao iha segundu lugar (01:36:19), Rubia Fatima Martins (01:37:52). Total atleta ne’ebe kompete iha numeru ne’e hamutuk nain 18.

Alende Juventina no Rubia, iha mos atleta Timor-Leste nain 2 mak Ermelinda de Jesus Ornai ne’ebe finish iha quatru lugar (01:41:46) no Marquita dos Santos iha pozisaun sextu lugar (01:49;49) - Jornalista: Xisto Freitas / Editor: Gantry Meilana

Foto: Juventina Napoleão de Jesus