PR TAUR MATAN RUAK: 20 DE AGOSTO REPREZENTA TIMOR-OAN NIA DETERMINASAUN

Iha Sábadu (20/08/2016) Estadu Timor Leste (TL) liu husi instituisaun Falintil Forsa Defeza Timor Leste (F-FDTL), komemora loron FALINTIL nian ba dala 41.

Komemorasaun loron istóriku ne’e tinan-tinan sempre la hala’o ne’e ho seremonia isar Bandeira Nasionál RDTL. No membrus Forsas Armadas F-FDTL mak sai hanesan korpu isar da bandeira. Selebrasaun loron FALINTIL tinan ida ne’e, la hanesan ho tinan hirak liu ba ne’ebé mak la iha partisipasaun bainaka sira husi nasaun seluk.  Maibé tinan ida ne’e hetan partisipasaun bainaka espesial sira husi nasaun amigu sira hanesan, Portugal, Australia, Cambodia inklui mós Indonesia.

No marka prezensa mós husi Xefi Governu Rui Maria de Araújo ho nia membrus Governu, membrus Parlamentu, eis titulares, eis veteranus balun inklui mós korpus diplomátikus no konvidadu sira seluk.

Iha komemorasaun ne’e Prezidenti Parlamentu Nasional (PN) Aderito Hugo da Costa sai hanesan inspetur da seremonia.

Entretantu Prezidenti Repúblika (PR) Taur Matan Ruak la marka prezensa iha seremonia ne’ebé hala’o iha Quartel Geral F-FDTL ne’e, maibé Xefi Estadu ne’e mós komemora loron FALINTIL nian hamutuk ho povu iha Suku Katerai Leten, Postu Administrativu Letefoho, Munisípiu Ermera, tanba nia hala’o programa vizita ba suku refere.

Iha nia diskursu Prezidenti Repúblika (PR), Taur Matan Ruak hateten katak, loron 20 de Agostu ne’e, reprezenta Timor-oan hotu nia determinasaun no vontade atu fila Timor Leste (TL) sai nasaun ida livre no independenti, husi okupasaun kolonialismu.

“Loron ida ne’e, loron importante ba ita hotu, tanba loron ida ne’e, reprezenta ita nia barani, ita nia determinasaun, vontade atu fila ita nia nasaun sai nasaun ida ukun rasik-an,” dehan PR Taur Matan Ruak, bainhira selebra komemorasaun loron FALINTIL ba dala 41 (20 de Agostu 197-20 de Agostu 2016), ho povu Suku Katerai Leten, Postu Administrativu Letefoho, Munisípiu Ermera, Sábadu.

Maibé Xefi Estadu ne’e dehan, atu ukun-an ne’e, Timoroan barak mak mate hodi sosa ukun-an ida ne’e.

“Ita la haluha sira iha loron ida ne’e, sira hotu iha ita nia rai, iha fatin ne’ebé de’it, ne’ebé fó ona sira nia-an ba ita nia nasaun, ita sei la haluha sira,” katak Taur Matan Ruak.

Xefi Estadu ne’e afirma, povu Timor laran tomak sei temi nafatin sira nia naran, tanba Timor Leste (TL) ne’e ukun-an ho sira nia sakrifísiu.

“Ita husu Maromak fó fatin ba sira hodi horik rohan laek, husu sira tulun ita nafatin para ita hamutuk lori ita nia nasaun ne’e ba oin,” afirma Taur Matan Ruak.

Alénde ne’e, Xefi Etadu ne’e dehan, nia vizita povu iha Suku sira iha Timor laran tomak ne’e atu agradese veteranus, faluk no oan kiak, li-liu povu tomak ba sakrifísiu no terus tomak, hodi Timor Leste ohin loron bele sai nasaun ida livre no independenti.cos

Jornal Nacional