BIS NIZIO BAKU FILA, EMA NAIN 2 MATE, 4 KANEK

Iha loron Domingu, (11/9) mais ou menus tuku 5:00 madrugada, Bus Nizio diresaun Same atu mai Dili, baku fila iha Marabia Suku Lahane Oriental, Postu Administrativu  Vera Cruz, Munisípiu Dili. Husi asidente trafiku ne’e rezulta ema nain rua (2) mate fatin, no nain haat (4) kanek kaman.

Bus Nizio ho matrikula 36-616 TL, hafoin monu liu tia menutu balun deit kareta Ambulansia evakua kedas ba tula mate isin  nain rua ne’e ba mortuariu, no mos sira ne’ebé mak kanek ne’e ba Hospital Nacional Guido Valadares (HNGV) Dili.

Asidente bus baku fila ne’e rezulta mos komunidade sira nian uma dapur ida rahun total inklui sasan dapur.

Eva de Jesus, hanesan sasin ba akontesimentu ne’e haktuir, antes asidente ne’e nia sai ba tau hela ahi iha dapur laran, la kleur deit rona tarutu maka’as los no nia halai sai husi dapur laran.

Nune’e nia foti matan hateke ba bus ida maka mai los dapur ne’e, hodi sasorut uma ne’e to’o rahun didiak no sasan dapur  nian mos rahun hotu.

La kleur deit, nia hateke ema hakilar iha bus nia laran, haree ba ema mos mate latan tiha ona iha rai nia leten,  no kondutor sai husi kareta halai liu tun ba Dili.

“Kauza husi asidente ne’e katak, ami rona husi pasajeirus sira ne’e,  haktuir dehan, kondutor   maka matan dukur depois haruka para deskansa kondutor lakohi. Ho ida ne’e maka tun mai hodi hetan asidente ne’e,”dehan Eva de Jesus ba JN-Diário iha  Bairu Raikuak Nahaek.

Iha parte seluk, Marina Agustinha da Costa, haktuir, fo-foun rona tarutu ne’e, nia hanoin katak,  buat ruma maka rahun. Maibe nia hateke sa’e ba lalatek haree ba bus ne’e halai tun deit mai hanoin katak,  bus ne’e atu ba soke nia uma, maibe bus ne’e halai ses tiha ba soke familia viziñu nia uma.

“Ne’e maka ami hakilar, ami hanoin sira uma nain maka mate,  maibe ami sa’e mai haree iha kareta baku fila fatin ne’e, mate balun latan tiha ona iha rai leten, depois maka sira husu ami nian ajuda,”hateten Marina Agustinha da Costa.

Regina da Conceição Mendonça, nu’udar sasin konta tuir katak, bus ne’e baku fila, tanba deskonfia kondutor matan dukur.

 “Ami sai husi Same tuku 2:00 kalan depois mai to’o iha Marabia kondutor hanesan matan dukur, entaun nia hakfodak derepenti kareta  ne’e tun tiha ona ba rai lolon ne’eba. Ha’u fila kotuk haree ha’u nian katuas oan kous ha’u nian oan haksoit sai tiha ona ne’ebe ha’u lahanete labarik nia apa mate, depois ha’u sa’e ba iha leten haree labarik nia apa mate duni iha fatin. Ne’ebe kareta baku fila ne’e ema nain rua mak mate fatin depois ema nain 4 hanesan ne’e mak kanek,” nia fo sasin.

Nune’e mos, Filomena Gorrete Soares, hanesan uma nain ba dapur ne’ebé a’at ne’e haktuir katak, bus Niziu ne’e baku fila halo estraga hotu kedas sira nian sasan dapur laran.

“Agora atu tau ahi mos ladiak tanba sasan dapur nian rahun hotu,  ne’ebe ami hein deit atu prosesu nusa, selu ami nian sasan ka lae?  Ami konta sasan ne’ebé maka estraga ne’e bele dehan, U$ 20,”dehan Filomena Gorrete Soares.

Tuir observasaun JN-Diário, hafoin asidente trafiku ne’e liu ema barak maka ba asiste hela bus baku fila ne’e.  Hafoin iha fatin akontesimentu ne’e ema tau ona aifunan balun iha fatin ne’e.

Nune’e fontes konfirmadu husi Hospital Nacional Guido Valadares haktuir katak, bus Nizio baku fila ne’e los duni. Tanba mate isin to’o iha HNGV.

“Bus baku fila ne’e iha dadersan, nain 4 mak kanek kaman kompostu husi nain tolu ema bo’ot no labarik nain ida ne’ebe ami haruka fila ona, nain rua mak mate fatin, agora iha morturiu,”dehan doutor ida nebe lakohi fo ninia naran JN-Diario iha HNGV, Domingu (11/9/16).

Tantu mate isin nain rua ne’e naran Amandio Mendonça Lopes (29) orijinal husi Munisípiu Ainaro ho Kaka Ilham husi Munisípiu Manufahi. Vitima sira evakua kedas husi fatin akontesimntu ba iha Hospital Nasional Guido Valadares (HNGV), maibe mate isin nain rua la halo autopsia tanba familia matebian hatene motivu mate ne’e mai husi dezastre ne’ebe parte hospital entrega kedas ba familia hodi ba halo prosesu funebre.

To’o notísia ne’e hatun seidauk hetan konfirmasaun husi parte Polisia Nasional Timor Leste (PNTL) kona-ba  kondutor ninia paraderu. avi/car

Jornal Nacional