PAM-MS FO TRATAMENTU BA LABARIK NO INAN SOFRE MALNUTRISAUN

Programa Alimentaria Mundial (PAM) hamutuk Ministeriu Saude (MS) hala’o tratamentu ba labarik no inan isin rua ho inan fo susu bebe, ne’ebe sofre malnutrisaun.

Portavos PAM ba Timor- Letse, Marianne Kearney dehan, Programa Alimentaria Mundial hamutuk ho Ministeriu da Saude  fo ona tratamentu ba labarik tinan lima ba kraik  hamutuk 10.802 no inan isin rua ou inan fo susu bebe hamutuk 12.181 ne’ebe sofre malnutrisaun ho isin krekas moderadu.

“Ami servisu hamutuk ho Ministeriu da Saude fo tratamentu ba inan isin rua no labarik sira ne’ebe hetan malnutrisaun liu husi fo aihan Timor Vita (batar uut) ba sira atu han para bele hadia fali sira nia isin,“ dehan Marianne Kearney ba JN-Diário iha nia servisu fatin Balide, Sesta (9/9/16).

Marianne Kearney husu ba inan isin rua no inan fo susu sira ne’ebe sofre malnutrisaun hakarak rekopera fali isin husi malnutrisaun, labele fahe aihan Timor Vita ba familia diak liu han mesak.

“Ami iha problema feto barak mak fahe ba sira nia familia ne’e problema tanba ne’e aihan khusus ba inan sira  atu dezenvolve sira nia bebe ho diak, karik inan ne’e hakarak bebe matenek los no forsa, labele fahe hahan Timor Vita ba familia ne’ebe isin diak, sira tenki han mesak,“nia sujere.

Nia dehan tan, feto timor barak mak ladun komprende konaba wanhira inan isin rua nia presiza aihan ne’ebe iha nutrisaun as liu.

“Inan isin rua sira kuandu bebe iha isin diak liu han manutolun, aifuan, modo tahan, ikan no na’an. Iha feto barak mak la aumenta hahahn sira ne’e, wanhira sira isin rua, ne’e problema entaun feto barak mak sofre malnutrisaun,“tenik nia. Car

Jornal Nacional