PEDN Nu’udar Prioridade FRETILIN

DILI, (ANTIL) – Prezidenti eleitu partidu Frente Revolusionariu Timor-Leste Independente (FRETILIN) periodu 2016 to’o 2021, Francisco Gutteres Lu-Olo hatete, eleisaun jerál 2017 partidu FRETILIN sei komunga Planu Estratéjiku Dezenvolvimentu Nasionál (PEDN) nu’udar prioridade bainhira hetan fi’ar hodi ka’er ukun.

“Garante paz no estabilidade, hala’o dezenvolvimentu nasionál tuir objetivu ne’ebé define iha Planu Estratéjiku Dezenvolvimentu Nasionál, liberta povu hosi ki’ak no mukit,” Lu-Olo ba ANTIL foin lalais ne’e hodi hatan pergunta atu alkansa vitória iha eleisaun, produtu politiku saida mak FRETILIN sei uza iha kampaña 2017 mai.

Lu-Olo husu atu militante no simpatizante FRETILIN hahú ohin ba oin servisu maka’as liu tan. Ne’on na’in nafatin no hamutuk ita bele! Ho lian fuan ida de’it maka atu hetan vitória tenke organiza no mobiliza nafatin kuadrus, militante, simpatizante no povu maubere tomak fó apoiu ba FRETILIN.

“A luta kontinua! Lutar para vencer!” Prezidenti Lu-Olo hato’o nia mensajen ba militante no simpatizante tomak ne’ebé namakari iha Timor-Leste.

Hodi hatutan bainhira FRETILIN hetan fi’ar hodi ka’er ukun iha eleisaun 2017 sei garante paz no estabilidade, hala’o dezenvolvimentu nasionál tuir objetivu ne’ebé define iha PEDN.

Aliende ida ne’e halo jestaun no administrasaun di’ak no transparente ba públiku nia di’ak no define métodos ka metodolojia serbisu nian hodi garante efikasia no efisiensia iha setóres, atividade oioin no liuliu defende no garante estadu de direitu demokrátiku.

Lu-Olo ho Mari Alkatiri liuhosi eleisaun direta FRETILIN ne’ebé realiza iha teritoriu Timor iha loron 3 Setembru foin lalais ne’e, militante hamutuk na’in 187.769 kontinua fó votus konfiasa hodi lidera partidu FRETILIN. (jornalista: Manuel Pinto; editora: Rita Almeida)